نۇر- سۇلتاندا بيۋدجەت قاراجاتىن يگەرمەگەن 15 لاۋازىمدى تۇلعا جاۋاپقا تارتىلدى

نۇر- سۇلتان. قازاقپارات - ەلوردادا وتكەن جىلدىڭ قورىتىندىسى بويىنشا بيۋدجەت قاراجاتىن ۋاقىتىلى يگەرمەگەن مەملەكەتتىك مەكەمەلەردىڭ ءتىزىمى جاريالاندى، دەپ حابارلايدى قازاقپارات ءتىلشىسى.

بۇگىن نۇر- سۇلتان قالالىق ءماسليحاتتىڭ كەزەكتى وتىرىسىندا 2021 -جىلعى قالالىق بيۋدجەتتىڭ يگەرىلۋ ماسەلەسى كوتەرىلدى.

«وتكەن جىلى قالالىق بيۋدجەتكە 720 ميلليارد 378 ميلليون تەڭگە قارجى ءتۇستى. وسىلايشا جوسپار 43 ميلليارد 156 ملن تەڭگەگە ارتىعىمەن ورىندالدى. ونىڭ ىشىندە جەكە تابىس 496 ملرد 264 ميلليون تەڭگەنى قۇرايدى. سونىمەن قاتار 2021 -جىلى سالىقتان 455 ميلليارد 273 ميلليون تەڭگە قارجى ءتۇستى. بيۋدجەت شىعىسىنا كەلسەك وتكەن جىلدىڭ قورىتىندىسى بويىنشا 699 ميلليارد 900 ميلليون تەڭگەنى قۇرادى»، - دەدى نۇر- سۇلتان قالاسى قارجى باسقارماسىنىڭ باسشىسى ءالىبي جۇمايەۆ ءماسليحات وتىرىسىندا جاساعان بايانداماسىندا.

باسقارما باسشىسى بەرگەن اقپاراتقا سايكەس وتكەن جىلى ەلوردا بيۋدجەتىن يگەرۋ كورسەتكىشى 97,2 پايىزدى قۇرايدى.

«بيۋدجەت قارجىسىن ۋاقىتىلى يگەرمەگەن ورگاندارعا كەلسەك. وتكەن جىلى قۇرىلىس باسقارماسى قارجىنىڭ 53,8 پايىزىن يگەرمەگەن، وتىن- ەنەرگەتيكا كەشەنى جانە كوممۋنالدىق شارۋاشىلىق باسقارماسى - 38,4 پايىز، ءبىلىم باسقارماسى - 1,5 پايىز، پوليتسييا دەپارتامەنتى - 1,4 پايىز، سول سياقتى دەنە شىنىقتىرۋ جانە سپورت باسقارماسى - 1,2 پايىزعا قارجىنى مەڭگەرمەي وتىر. 2021 -جىلدىڭ قورىتىندىسى بويىنشا بيۋدجەت قاراجاتى ۋاقىتىلى يگەرىلمەگەنى ءۇشىن 15 لاۋازىمدى تۇلعا جاۋاپكەرشىلىككە تارتىلدى»، - دەيدى ول.

اۆتور: ءالي يبرايەۆ