موڭعوليادا كوروناۆيرۋس جۇقتىرعان 15 ادام تىركەلدى
موڭعوليانىڭ ينفەكتسيالىق اۋرۋلاردى ۇلتتىق زەرتتەۋ ورتالىعىنداعى وقشاۋلاعىشىنا جاتقىزىلعان تۇركيا ازاماتىنان كوروناۆيرۋسقا الىنعان سىناما قورىتىندىسى وڭ ناتيجە كورسەتتى.
بۇل تۋرالى بۇگىن موڭعوليا دەنساۋلىق ساقتاۋ مينيسترلىگىنىڭ بريفينگىندە ورتالىقتىڭ ديرەكتورى د. ءنيامحۇۇ ءمالىم ەتتى.
بۇل ەلدەگى تىركەلگەن كوروناۆيرۋسقا شالدىعۋدىڭ 15-وقيعاسى.
ەسكە سالا كەتەيىك، تۇركيا ازاماتى 28- ناۋرىزدا موڭعوليانىڭ ۇلانباتىر قالاسىنا چارتەرلىك رەيسپەن كەلگەن. ول تۇركيا ەلشىلىگى قىزمەتكەرىنىڭ جاقىنى، ونىمەن بىرگە وتباسىنىڭ تاعى ەكى مۇشەسى بولعان.
ولار كەلگەن كەزدە، بىردەن وقشاۋلاعىشقا جابىلعان. 1- ساۋىردە موڭعوليا د س م ەكەۋىنىڭ كوروناۆيرۋسقا شالدىققانىن راستادى، التى كۇن وتكەن سوڭ، تۇركيانىڭ ءۇشىنشى ازاماتىنان دا ىندەت انىقتالعان.
6- ساۋىردەگى جاعداي بويىنشا، موڭعوليادا جاڭا تيپتەگى كوروناۆيرۋس جۇقتىرۋدىڭ 15 وقيعاسى تىركەلدى، 13 ادام ستاتسيوناردا ەم قابىلداپ جاتىر، تاعى ەكەۋى دەرتتەن جازىلىپ، ۇيىنە كارانتينگە وقشاۋلانعان.
بۇگىندە ەلدە 248 ادام دارىگەرلەردىڭ باقىلاۋىندا. الداعى كۇندەرى توكيودان ۇشاتىن چارتەرلىك رەيستەن موڭعوليانىڭ 184 ازاماتى ەۆاكۋاتسيالانادى.