استانادا جىل سايىن شامامەن 15 مەكتەپ سالىنۋى ءتيىس
وسى ماسەلەنى شەشۋ ءۇشىن استاناعا جىل سايىن شامامەن 15 مەكتەپ سالىنۋى ءتيىس، دەپ حابارلايدى قازاقپارات قالا اكىمدىگىنىڭ سايتى.
بۇل ماسەلەنى 2015-2017 -جىلدارعا ارنالعان «نۇرلى جول» باعدارلاماسىنىڭ «الەۋمەتتىك ينفراقۇرىلىمدى دامىتۋ» باعىتىن جۇزەگە اسىرۋ بويىنشا رەسپۋبليكالىق بيۋدجەتتەن جانە ۇلتتىق قوردان بولىنگەن قاراجاتتى ماقساتتى يگەرۋگە ارنالعان «نۇر وتان» فراكسياسىنىڭ جانىنداعى جيىندا تالقىلادى. ءبىلىم جانە عىلىم ۆيتسە- ءمينيسترى بيبىگۇل اسىلوۆانىڭ ايتۋىنشا، ءۇش اۋىسىمدى مەكتەپتەردىڭ پايدا بولۋى ول دەموگرافيالىق جانە كوشى- قون ماسەلەسىنە بايلانىستى.
«قازاقستانداعى حالىق سانىنىڭ ءوسىمى جىل سايىن 230 مىڭ ادامدى قۇرايدى. ونىڭ ىشىندە استانا، الماتى، شىمكەنت جانە الماتى مەن تۇركىستان وبلىسىنداعى تابيعي جانە كوشى- قون ماسەلەسىنە بايلانىستى جىل سايىن حالىق ءوسىمى 40-50 مىڭدى قۇراۋدا. سول سەبەپتى، الەۋمەتتىك ينفراقۇرىلىم وسى شارالارعا ۇلگەرمەۋدە. ويتكەنى، ەلىمىزدە جىل سايىن رەسپۋبليكالىق بيۋدجەت ەسەبىنەن 10 مەكتەپ سالىنۋ كەرەك، ال استانادا 15 مەكتەپ» ، - دەدى ول. وسى جەردە ول ينۆەستورلاردى مەكتەپ سالۋعا ىنتالاندىرۋ كەرەك دەدى. ءۇشجىلدىق بيۋدجەت شەڭبەرىندە جەكە سەكتورعا ءبىلىم بەرۋ وبەكتىلەرىنىڭ قۇرىلىسى بويىنشا، ستۋدەنتتىك جاتاقحانا قۇرىلىس جوباسىنا ۇقساس وتەماقى تولەمدەرى كوزدەلەدى. «قازىر بارلىق ايماقتا مەكتەپ سالۋعا قىزىعۋشىلىعى بار بيزنەسمەندەر بار، ءبىز وسى باعىتتا جۇمىس جاساپ جاتىرمىز» ، دەدى ب. اسىلوۆا.