ەلوردادا «مۋزارت» توبىنىڭ 15 جىلدىعىنا ارنالعان كونسەرت ءوتتى - فوتو
ەلىمىزدە كەڭىنەن تانىلعان تريو مەرەكەلىك كەشكە جينالعان تىڭدارماندارىنا ەل اراسىندا كەڭ تاراعان اندەرىن ورىنداپ، كوپشىلىك قوشەمەتىنە بولەندى. « ءۇش قوڭىر» ، «سۇيكىمدىم» ، «شاتتانامىن» ، «تامشىلار» دەگەن اندەرمەن شىمىلدىعى تۇرىلگەن كونسەرت 15 جىل بويى توپ رەپەرتۋارىندا جيناقتالعان حيت اندەرمەن جالعاسىن تاپتى. شىعارماشىلىق توپ وزدەرىنىڭ ۇزدىك اندەرىن ديريجەرلەر الەكساندر بەلياكوۆ، الەكساندر ابىلايەۆپەن، كومپوزيتور ءارى پروديۋسەر رينات عايسينمەن جانە «استانا» ەسترادالىق- سيمفونيالىق وركەسترىمەن بىرگە ورىندادى.
ارتىستەردىڭ ايتۋىنشا، استانادا ۇلكەن كونسەرت وتكىزۋ ولاردىڭ كوپتەن بەرگى ارمانى بولعان. انشىلەردى تىڭدارماندار دا ساعىنىپ قالعانداي، كونسەرت زالىندا بوس ورىن بولمادى. تىڭدارماندار جاندى داۋىسپەن ايتىلعان انگە قوشەمەت كورسەتىپ، ساحنادا ءاننىڭ ماعىناسىنا قاراي سان قۇبىلعان بەينەەففەكتىلەرگە دە تاڭدانىسىن جاسىرمادى.
كونسەرت بارىسىندا توپ مۇشەسى ساكەن مايعازيەۆ ەلىمىزدە سابيلەردىڭ ەسىمىن مۋزارت دەپ قويعاندار بار، وسىنداي ازاماتتاردى سىنعا الماي، كەرىسىنشە بۇل باستامانى قولداۋ كەرەك دەدى.
«مۋزارت» - كونە تۇركى تىلىنەن شىققان. «ۋز» - سال، سەرى، تاعى سول سياقتى ەر ازاماتقا ءتان قاسيەتتەردى، ال «ارت» - بيىك، شىڭ، تاۋ دەگەن ماعىنانى بىلدىرەدى. بىز باستاپقىدا توپتى ۋزارت دەپ اتاماقشى بولدىق. ودان كەيىن «م» ءارپىن قوسىپ، مۋزىكا سوزىنە كەلتىردىك. مەيرامبەك، ماقسات پەن مايعازيەۆ تە «م» ارپىنەن باستالادى. سوندىقتان، ءسابيدىڭ ەسىمىن مۋزارت قويعاندا تۇرعان ەشتەڭە جوق، كەرىسىنشە، ول تەك جاقسى ماعىنانى بىلدىرەدى» ، - دەدى س. مايعازيەۆ.
ايتا كەتەيىك، مۋزارت توبى 2001 -جىلدىڭ ءساۋىر ايىندا قۇرامىندا ساكەن مايعازيەۆ، مەيرامبەك بەسبايەۆ جانە ماقسات بازاربايەۆ ونەر كورسەتەتىن تريو رەتىندە قۇرىلعان. توپتىڭ العاشقى ورىنداعان ءانى - مۇقاعالي ماقاتايەۆتىڭ سوزىنە جازىلعان قانات يبرايموۆتىڭ «سەنىڭ كوزىڭ» اتتى شىعارماسى. 2005 -جىلى توپ مۇشەلەرىنىڭ ءبىرى ماقسات بازاربايەۆ جەكە انشىلىك جولىنا ءتۇسىپ، ورنىنا توپتىڭ جاڭا مۇشەسى رەتىندە كەنجەبەك ءجانابىلوۆ كەلەدى. 2007 -جىلى «مۋزارت» قۇرامى كەڭەيتىلىپ، توپ ۆوكالدى - اسپاپتى انسامبل رەتىندە ءوز جۇمىسىن باستادى. انسامبلدىڭ «ءوز ەلىم» ، «شىنارىم» ، «شاشباۋلىم» ، «قازاقتاي ەل قايدا» ، «ساعىندىم الماتىمدى» ، «ءۇشقوڭىر» ، «اناعا سالەم» ، «قايران كوڭىل» اتتى اندەرى حالىق اراسىندا كەڭ تاراعان.
فوتو: باۋىرجان جۋاسبايەۆ