اپتاپ ىستىق 15 ادامنىڭ ءومىرىن قيدى
12:13, 29 - شىلدە 2014
استانا. قازاقپارات - 21- شىلدەدەن بەرى جاپونيادا اپتاپ ىستىقتان كەمىندە 15 ادام قازا تاپتى. ال 8580 ادامنىڭ باسىنان كۇن ءوتىپ، اۋرۋحاناعا جەتكىزىلدى.
.
شەتەلدىك ب ا ق-تىڭ جاپونيانىڭ ءورت قىزمەتى باسقارماسىنا سىلتەمە جاساپ حابارلاۋىنشا، بۇعان دەيىنگى اپتامەن سالىستىرعاندا اۋرۋحاناعا جاتقىزىلعان ادامداردىڭ سانى 2,6 ەسەگە ارتىپ وتىر.
اۋرۋحاناعا تۇسكەن ادامداردىڭ باسىم بولىگى - جاپون استاناسىنىڭ تۇرعىندارى. كۇن ءوتىپ، دارىگەردىڭ قاراۋىنا تۇسكەن توكيو تۇرعىندارىنىڭ سانى - 620 ادام.
ايتا كەتەرلىگى، جاپونيانىڭ باسىم اۋداندارىنداعى اۋا تەمپەراتۋراسى 30 گرادۋستان اسىپ جىعىلادى. سوندىقتان دا تۇرعىندارعا كوشەگە باس كيىمسىز شىقپاۋعا كەڭەس بەرىلۋدە.
اۆتور: مارلان جيەمباي