كۇن سايىن 150 قازاقستاندىق بانكروت دەپ تانىلىپ جاتىر

استانا. قازاقپارات - قارجى ۆيتسە-ءمينيسترى ەرجان ءبىرجانوۆ جەكە ادامداردىڭ بانكروتتىعى راسىمىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

«بيىلعى 3- ناۋرىزداعى بانكروتتىق تۋرالى زاڭ اياسىندا ءتيىستى جۇمىستار ىسكە اسىرىلىپ جاتىر. وسى كۇننەن باستاپ وتىنىمدەردى قابىلداي باستادىق. زاڭعا سايكەس، تەكسەرۋ جۇرگىزۋگە جارتى جىل ۋاقىت قاراستىرىلعان. بۇل تۇرعىدا ءبىز ناۋرىزدا (ءوزىن بانكروت دەپ جاريالاعىسى كەلەتىن ادامنان - اۆتور) بىردەن ءوتىنىمدى قابىلداپ، بانكروت دەپ جاريالاي المايمىز. ءدال قازىر جارتىجىلدىق مەرزىم ءوتتى. ەندى بانكروت دەپ جاريالاۋ پروتسەدۋراسى ءجۇرىپ جاتىر. العاشقى كۇندەرى ادامداردان تۇسكەن 370 تەن اسا ءوتىنىمدى قاراستىرىپ، ولاردى بانكروت دەپ جاريالادىق»، - دەدى ە. ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، كۇن سايىن بانكروتتاردىڭ تىزىمىنە 100-200 ادام قوسىلىپ وتىرادى. جالپى سوتتان تىس بانكروتتىق راسىمىنە 65 مىڭ قازاقستان ازاماتى ءوتىنىم بەردى.

«1- قىركۇيەكتەگى جاعداي بويىنشا 10 مىڭ ادام بانكروت دەپ جاريالاناۋى مۇمكىن، بۇل ادامدار بىرتىندەپ تىزىمگە قوسىلىپ وتىرادى. الايدا وتىنىمدەر كۇن سايىن ءتۇسىپ جاتىر. ءتىزىم تولىقتىرىلادى. وسى 10 مىڭ ادامنىڭ شامامەن 400 گە جۋىعىن بانكروت دەپ تانىدىق. كۇن سايىن بانكروت تىزىمىنە 100-150 ادام قوسىلادى»، - دەدى ۆيتسە-مينيستر.

بۇدان بۇرىن حابارلانعانداي، جەكە ادامداردىڭ بانكروتتىعى اياسىندا ناۋرىز ايىندا وتىنىشتەر قابىلداۋ باستالدى.