احمەت بايتۇرسىن ۇلىنىڭ 150 جىلدىعىنا ارنالعان تۇركىتانۋشىلار كونگرەسى ءوتتى - فوتو
بۇل تۋرالى ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
شاراعا يۋنەسكو، تۇركسوي حالىقارالىق ۇيىمداردىڭ وكىلدەرى مەن تۇركيا، ازەربايجان، وزبەكستان مەن رەسەي عالىمدارى قاتىستى. كونگرەستىڭ اشىلۋ سالتاناتىندا تۇركىستان وبلىسىنىڭ اكىمى دارحان ساتىبالدى مەملەكەت باسشىسى قاسىم-جومارت توقايەۆتىڭ قاتىسۋشىلارعا ارناعان قۇتتىقتاۋ ءسوزىن وقىدى.
«ۇلت ۇستازى اتانعان احاڭ ءتۇبى ءبىر، تاريحى تامىرلاس ەلدەر ءۇشىن اسا قۇندى عىلىمي-تانىمدىق مۇرا قالدىردى. سول سەبەپتى ونى بارشا تۇركى جۇرتى قۇرمەت تۇتادى. ازەربايجان، باشقۇرت، وزبەك، تۇرىك حالىقتارىنىڭ بەلگىلى عالىمدارى باس قوسقان بۇگىنگى كونگرەسس سونىڭ ايقىن دالەلى»، - دەلىنگەن پرەزيدەنتتىڭ قۇتتىقتاۋ سوزىندە.
شارا بارىسىندا 4 تىلدە جارىق كورگەن احمەت بايتۇرسىن ۇلىنىڭ تاڭدامالى شىعارمالارىنىڭ جانە فيلولوگيا عىلىمدارىنىڭ دوكتورى الماسبەك ءابسادىقتىڭ «سەرت»، «ۇستاز جولى» كىتاپتارىنىڭ تۇساۋكەسەرى ءوتتى.
كونگرەسس سوڭىندا ارنايى قارار قابىلدانىپ، تۇركيا مەن وزبەكستان عالىمدارى «احمەت بايتۇرسىن ۇلى» توسبەلگىسىمەن ماراپاتتالدى.
اۆتور
ءاليحان اسقار