ەرلان قارين احمەت بايتۇرسىن ۇلىنىڭ 150 جىلدىق مەرەيتويىنىڭ جوسپارى تۋرالى باياندادى
«بۇگىن وقۋ- اعارتۋ، ءبىلىم جانە جوعارى ءبىلىم مينيسترلەرىمەن بىرگە احمەت بايتۇرسىن ۇلىنىڭ 150 جىلدىق مەرەيتويىن اتاپ ءوتۋ بارىسىن تالقىلادىق.
«جىل باسىنان بەرى الاش ارداقتىسىنىڭ بەينەسىن، ەسىمىن دارىپتەۋ، ۇلت جادىندا قالدىرۋ ماقساتىنداعى كوپتەگەن ءىس- شارالار ۇيىمداستىرىلدى. يۋنەسكو، تۇركسوي سەكىلدى حالىقارالىق ۇيىمدار اياسىندا دا ءبىرقاتار عىلىمي- اعارتۋشىلىق باعىتتاعى جيىندار وتكىزۋ جوسپاردا بار. مىسالى، ەرتەڭ حالىقارالىق تۇركى اكادەمياسى عىلىمي كەڭەسىنىڭ V وتىرىسى بولادى. سونىڭ شەڭبەرىندە ا. بايتۇرسىن ۇلىنىڭ مەرەيتويىنا ارنالعان كونفەرەنتسيا وتەدى»، - دەدى مەملەكەتتىك كەڭەسشى.
سونداي- اق ول ۇلتتىق قۇرىلتايدا اقىن سۆەتقالي نۇرجان ۇلت ۇستازىنىڭ مەرەيتويى قارساڭىندا اتقارىلۋى قاجەت بىرنەشە ۇسىنىس ايتقانىن جەتكىزدى. ول ۇسىنىستار جالپى رەسپۋبليكالىق جوسپاردى جۇزەگە اسىرۋ بارىسىندا قارالاتىن بولادى.
«سونىمەن قاتار، بۇگىن ۇلتتىق قۇرىلتايدىڭ ءبىر توپ مۇشەلەرىمەن جۇمىس كەزدەسۋىن وتكىزدىك. كەزدەسۋگە ۇكىمەتتىك ەمەس ۇيىمدار مەن قوعامدىق بىرلەستىكتەردىڭ وكىلدەرى قاتىستى. وندا ۇلتتىق قۇرىلتايدىڭ ءبىرىنشى وتىرىسىندا مەملەكەت باسشىسى بەرگەن تاپسىرمالاردىڭ ورىندالۋ بارىسىن تالقىلادىق. ونىڭ ىشىندە Quryltai قوسىمشاسىنىڭ ازىرلەنۋى جونىندە ءسوز قوزعالدى. بۇل پلاتفورما ءاربىر ازاماتقا الەۋمەتتىك ماڭىزدى ماسەلەلەر بويىنشا يدەيالار مەن باستامالاردى ۇسىنۋعا مۇمكىندىك بەرەتىن بولادى. سونىمەن قاتار، ارىپتەستەرىمىزبەن بىرگە الداعى جۇمىسىمىزدىڭ فورماتىن بەلگىلەدىك. مۇنداي كەزدەسۋلەر ۇلتتىق قۇرىلتايدىڭ باسقا دا مۇشەلەرىمەن وتەتىن بولادى»، - دەدى ەرلان قارين.