انكارادا احمەت بايتۇرسىن ۇلىنىڭ 150 جىلدىعىنا ارنالعان جيىن ءوتتى
«تاۋەلسىزدىك - قازاقستان حالقى ءۇشىن ەڭ قاستەرلى قازىنا جانە باستى بايلىعى. قازاقستان تاريحى تالاي جارقىن كەزەڭدەردەن تۇراتىنىن، سونداي جارقىن كەزەڭدەردىڭ ءبىرى - وتكەن عاسىردىڭ باسىندا الاش تۋى استىندا بىرىككەن زيالىلار مەن قايراتكەرلەرىمىزدىڭ حالقىن ازاتتىققا جەتكىزۋ جولىندا جۇرگىزگەن كۇرەسى»، - دەدى قازاقستان ەلشىسى ەركەبۇلان ساپيەۆ «عاسىر ۇستازى - احمەت بايتۇرسىن ۇلى» اتتى دوڭگەلەك ۇستەل وتىرىسىندا.
ال ەۋرازيا جازۋشىلار وداعىنىڭ ءتوراعاسى ياكۋپ ومەروعلۋ XX عاسىردىڭ باسىندا قازاقستانداعى ۇلت- ازاتتىق قوزعالىس باسشىلارىنىڭ ءبىرى، قازاق ءتىلىنىڭ عالىمى ءارى ادەبيەت قايراتكەرى، «الاش وردا» قوزعالىسىنىڭ مۇشەسى احمەت بايتۇرسىن ۇلىنىڭ 150 جىلدىق مەرەيتويىنا وراي قازاقستان ەلشىلىگىندە وسىنداي جيىننىڭ ۇيىمداستىرىلعانىنا العىس ءبىلدىردى. ول سوزىندە احمەت بايتۇرسىن ۇلى بالالار ءۇشىن كوپتەگەن ەڭبەكتەر جازىپ، ونىڭ باستىسى اراب ءالىپبيىن قازاق تىلىنە بەيىمدەپ، قازاق بالالارىنا ارنالعان تۇڭعىش «الىپپە» كىتابىن 1912 -جىلى شىعارعانىن جانە بۇل كىتاپ سول كەزدەگى قازاق حالقىنىڭ اعارتۋ ىسىنە قوسقان ەرەكشە ۇلەسى ەكەنىن اتاپ ءوتتى.
حاجى بايرام ۆەلي اتىنداعى ۋنيۆەرسيتەتتىڭ وقىتۋشى- زەرتتەۋشىلەرى گۇلجانات قۇرمانعاليەۆا- ەرجيلاسۋن مەن حۋليا كاساپوعلۋ چەنگەل وزدەرىنىڭ باياندامالارىندا احمەت بايتۇرسىن ۇلىنىڭ قازاقستان تاريحىندا ەرەكشە ورىنعا يە ەكەنىن، ول تەك قازاق حالقى ءۇشىن عانا ەمەس، بۇكىل تۇركى الەمىنە قاجەتتى رۋحاني جانە مادەني دۇنيەلەرگە سول كەزدە باسا نازار اۋدارعان ۇلى تۇلعا ەكەنىنە كەڭىنەن توقتالدى. ونىڭ جازعان ولەڭدەرى، ەڭبەكتەرى، ماقالالارى، «قازاق گازەتىن» باسىپ شىعارۋى، سونداي- اق «الاش» قايراتكەرلەرىنىڭ جازعان ەڭبەكتەرى تۇركى الەمىنە قالدىرعان مۇراسى ەكەنىنە نازار اۋداردى.
حاجى بايرام ۆەلي اتىنداعى ۋنيۆەرسيتەتىنىڭ دوكتورانتى ەلدوس توقتارباي ءوزىنىڭ بايانداماسىندا ۇلت ۇستازى ا. بايتۇرسىن ۇلىنىڭ باسىنان وتكەرگەن قيىنشىلىقتارى مەن جازعان ەڭبەكتەرىنە نازار اۋدارىپ، ونىڭ ەڭبەكتەرى ءالى دە تەرەڭ زەرتتەۋدى تالاپ ەتەتىنىن اتاپ ءوتتى.
اتالعان دوڭگەلەك ۇستەلدىڭ سوڭىندا قاتىسۋشىلار ا. بايتۇرسىن ۇلىنىڭ سيرەك كەزدەسەتىن سۋرەتتەرىنەن تۇراتىن كورمەنى ۇلكەن قىزىعۋشىلىقپەن قارادى. سونداي- اق، انكارادا جوعارى وقۋ ورىندارىندا ءبىلىم الىپ جۇرگەن ستۋدەنتتەردىڭ ورىنداۋىندا قازاقتىڭ كۇي مەن اندەرى ورىندالدى.