الماتىدا ەسىرتكى زەرتحاناسى انىقتالدى: 150 ميلليون تەڭگەنىڭ شيكىزاتى تاركىلەندى

الماتى. قازاقپارات - الماتىدا سينتەتيكالىق ەسىرتكىنى وندىرۋگە ارنالعان شيكىزاتتىڭ ءىرى كولەمى تاركىلەندى، دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ مالىمەتىنشە، ەسىرتكى دايىندايتىن سەح «قالقامان» ىقشاماۋدانىنداعى جەكە ءۇيدىڭ جەرتولەسىندە جۇمىس ىستەگەن. بەلگىلى بولعانداي، ءۇي وتكەن جىلدىڭ قازان ايىندا جاس جىگىتكە اي سايىنعى 300 مىڭ تەڭگەگە جالعا بەرىلگەن.

«رۇقسات ەتىلگەن ءتىنتۋ كەزىندە ۇنتاق جانە كەسەك تۇرىندەگى زاتتار، پلاستيك ىدىستار، ەلەكتروندى تارازىلار جانە مەفەدرون سينتەتيكالىق پسيحوتروپتىق زاتىن ءوندىرۋ كەزىندە قىلمىسكەرلەر پايدالانعان باسقا دا دۇنيەلەر تاركىلەندى. ەسىرتكى شىعارۋعا جاۋاپتى - 23 جاستاعى و. ەسىمدى ازامات. اياقتالماعان مەديتسينالىق ءبىلىمى بار جاس جىگىت، ەسىرتكى ءوندىرىسىن جولعا قويعان. جالپى، ەسىرتكى زەرتحاناسىنان بىرنەشە كەلى كەپتىرىلگەن ءشوپ تاركىلەندى. سوتقا دەيىنگى تەرگەۋ باستالدى»، - دەدى الماتى قالالىق پوليتسيا دەپارتامەنتى باستىعىنىڭ ورىنباسارى بەرىك ابىلبەكوۆ.

پوليتسيا قىزمەتكەرلەرى جەدەل تۇردە ەسىرتكى بيزنەسىنە تاعى بەس ادامنىڭ قاتىستىلىعىن انىقتادى، ولاردىڭ ەكەۋى 23 جانە 19 جاستاعى قىزدار. ولار - تۇركىستان جانە الماتى وبلىستارىنان كەلگەن. ولاردىڭ مىندەتتەرىنە دايىن ەسىرتكىلەرگە بەتبەلگى قويۋ كىردى. كۇدىكتىلەر قاماۋعا الىندى.

«قىلمىستى ۇيىمداستىرۋشىنىڭ ايتۋىنشا، ول Telegram-داعى كۋراتوردىڭ نۇسقاۋى بويىنشا ارەكەت ەتكەن. زەرتحاناعا ارنالعان قۇرامداس بولىكتەردى الماتى وبلىسى تالعار اۋدانى اۋماعىنداعى «بەتبەلگىلەر» ارقىلى العان.

ءبىر اپتا ىشىندە ول 2-3 كەلىگە جۋىق سينتەتيكالىق ەسىرتكى جاساعان، جۇمىسى ءۇشىن بيتكوينمەن اپتا سايىن 280 مىڭ تەڭگە كولەمىندە قاراجات الىپ وتىرعان. ساراپتاما قورىتىندىسى بويىنشا، تاركىلەنگەن زاتتار جالپى سالماعى 4 كەلىدەن اساتىن «ا- PVP» سينتەتيكالىق ەسىرتكى زاتى، مەفەدرون - 312 گرام جانە 15 ليتر تۋلۋول (پرەكۋرسور). شيكىزات باعاسى - 150 ميلليون تەڭگە»، - دەدى ابىلبەكوۆ.