اباي تويىنا ارنالىپ 150 اقىن قاتىسقان الامان جىر جارىسى مارەگە جەتتى
«جۇرەگىمنىڭ تۇبىنە تەرەڭ بويلا!» دەگەن ايدارمەن جاريالانعان الامان جىر جارىسىنا رەسپۋبليكامىزدىڭ تۇپكىر- تۇپكىرىنەن بەلگىلى جىر جۇيرىكتەرى باستاپ، جاس تالاپكەرلەر قوستاپ 150 اقىن قاتىستى. ابايداي كەمەڭگەر تۇلعانى جىرعا قوسىپ، الىپ اقىننىڭ الەمىن جارقىراتا اشۋ وڭاي شارۋا ەمەس ەكەنى ەكىنىڭ بىرىنە بەلگىلى. الايدا، ءمۇشايرا جۇلدەسىنەن ۇمىتكەرلەردىڭ كوپ ىزدەنىپ، كوپ تولعانعانى كوڭىل قۋانتتى.
اقىنداردىڭ كوپشىلىگى اباي ولەڭدەرىنىڭ، «قارا سوزدەرىنىڭ»، مۇحتار اۋەزوۆتىڭ «اباي جولى» رومانىنىڭ اياسىنان شىعا الماي قالعاندىعى بايقالادى. ابايدى جىرلاۋ - ابايدىڭ «قارا سوزدەرىن» ۇيقاسقا ءتۇسىرىپ، قايتا مازمۇنداپ بەرۋ ەمەس ەكەندىگىن اڭعارماعان. اقىننىڭ «قارا ءسوزىن» ولەڭگە اينالدىرعاننان نە ۇتامىز؟ ودان دا «قارا ءسوزدى» ءتۇپنۇسقادان وقىعانىمىز ارتىق ەمەس پە؟ سونداي- اق، ءبىراز اقىندار اباي رومانىنداعى ەپيزودتاردى ولەڭگە اينالدىرعان. بۇل تالاپتارى دا ناتيجە بەرمەگەن. ابايدى جىرلاۋ - ابايدىڭ ءوز ولەڭدەرىندەگى ويلاردى قايتالاپ ايتۋ ەمەس قوي. بۇل جاعىنان دا ۇمىتكەلەر ۇتىلعان. ابايدى جىرلاۋ ءۇشىن ۇلكەن جۇرەك، ابايعا دەگەن ۇلى ماحاببات، تەرەڭ وي، ىستىق سەزىم، اقىندىق قۋات كەرەك. الايدا، «الۋان- الۋان جۇيرىك بار، الىنە قاراي جۇگىرەر» دەگەندەي اباي اتاسىن وزىنشە جىرلاپ، ورنەكتى ولەڭدەرىمەن سۋىرىلا شاپقان تالانتتار دا بولدى.
ءمۇشايراعا تۇسكەن شىعارمالاردىڭ ىشىندە كولەمدى داستاندار دا بولدى. كونكۋرس شارتىندا پوەما بولماعاندىقتان، ول شىعارمالار قازىلار القاسىنىڭ تالقىسىنا ۇسىنىلمادى.
بەلگىلى قالامگەرلەردەن قۇرالعان قازىلار القاسى ءمۇشايراعا قاتىسقان شىعارمالاردى سۇرىپتاي كەلە 12 اقىنعا بايگە بەردى.
قازاقستان جازۋشىلار وداعىنىڭ نۇر- سۇلتان قالالىق فيليالىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى، اقىن داۋلەتكەرەي كاپ ۇلى قازىلار القاسىنا ءتوراعالىق ەتتى. قازىلار قۇرامىندا مەملەكەتتىك سىيلىقتىڭ لاۋرەاتى، جازۋشى قاجىعالي مۇحامبەتقالي ۇلى، ايگىلى اقىن، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ لاۋرەاتى سەرىك اقسۇڭقار ۇلى، بەلگىلى جۋرناليست، قازاقستاننىڭ ەڭبەك سىڭىرگەن قايراتكەرى جانبولات اۋپبايەۆ، مەملەكەتتىك سىيلىقتىڭ لاۋرەاتى، اقىن نەسىپبەك ايت ۇلى بولدى.
ساراپشىلار بارىنشا سىن كوزبەن قاراپ، تالعام تارازىسىنا سالىپ، بايگەگە قاتىسقان ءار ولەڭگە كوركەمدىك تۇرعىدان باعا بەرىپ، ادىلەت بيىگىنەن كورىنۋگە تىرىستى. ءمۇشايرا ۇلى اباي تويىنا ارنالعاندىقتان ولەڭدەردىڭ ويلارى تۇنىق، پاراساتى بيىك، مازمۇنى تەرەڭ، ءتىلى قۇنارلى، كوركەمدىگى شۇرايلى بولۋىن قاداعالاپ، اباي تۇلعاسىن اسقاقتاتا جىرلاۋدى باستى نازاردا ۇستادى.
اقىنداردىڭ كوپشىلىگى اباي باستان كەشىرگەن زاردى، سول زاماننىڭ قارا بۇلتىن بۇگىنگى تاۋەلسىز قازاقستاننىڭ اشىق اسپانىنان دا كورگەن سياقتى سىڭاي تانىتادى. اباي زامانىندا وتىرعانداي كۇڭىرەنەدى. اباي زامانىمەنەن بۇگىنگى زاماننىڭ اراسى جەر مەن كوكتەي. اباي كۇتكەن جارقىن زامانعا جەتىپ، اباي اڭساعان اسقاق ارماننىڭ ورىندالىپ، تاۋەلسىز ەلىمىزبەن بىرگە اباي مۇراتىنىڭ جۇزەگە اسقانىن نەگە ماقتانىش ەتپەسكە؟! وكىنىشكە قاراي، كەيبىر اقىنداردىڭ ولەڭدەرى ورىندالۋ جاعىنان شەبەر بولعانىمەن، يدەيالىق جاعىنان سىن كوتەرمەدى. زارلاۋدىڭ دا، جىلاۋدىڭ دا، قوعامدى قارالاۋدىڭ دا شەگى بار. تاۋەلسىزدىكتىڭ، ەل بولىپ ەتەك جاپقانىمىزدىڭ قادىرىن ۇمىتپاعان ءجون ەدى.
سونىمەن قازىلار القاسى اقىلعا سالىپ، كەڭەسە كەلە باس بايگەنى «ابايدىڭ بۇلاعى» دەگەن توپتاما ولەڭدەرى ءۇشىن بەلگىلى اقىن، فيلولوگيا عىلىمدارىنىڭ دوكتورى، ەۋرازيا ۇلتتىق ۋنيۆەرسيتەتىنىڭ پروفەسسورى، حالىقارالىق «الاش» ادەبي سىيلىعىنىڭ لاۋرەاتى جانات اسكەربەك قىزىنا (نۇر- سۇلتان) بەرۋدى ۇيعاردى.
ءبىرىنشى ورىندى جاس اقىن، رەسپۋبليكالىق جىر بايگەسىنەن جۇلدە الىپ جۇرگەن قابيدەن قۋانىشباي ۇلى (نۇر- سۇلتان) «ارمانى جوق ابايى بار حالىقتىڭ» اتتى ولەڭدەر توپتاماسىمەن قانجىعاسىنا بايلاندى.
ەكىنشى ەكى ورىننىڭ ءبىرىن قازاقتىڭ قابىرعالى اقىنى، «الاش»، «تارلان» سىيلىقتارىنىڭ لاۋرەاتى يسرايل ساپارباي (الماتى) «يماني گۇلدىڭ توركىنى» توپتاماسىمەن يەلەندى.
ەكىنشى ورىننىڭ ەكىنشىسى «كەمەڭگەر» ولەڭدەر توپتاماسى ءۇشىن بەلگىلى اقىن، رەسپۋبليكالىق ءمۇشايرالاردىڭ بىرنەشە دۇركىن جۇلدەگەرى باقىتجان رايسوۆاعا (وسكەمەن) بەرىلدى.
ءۇشىنشى ءۇش ورىن بەلگىلى اقىندار سەرىكجان قاجيدىڭ (الماتى) «اقىلىنا جاۋ ەمەسپىن ابايدىڭ»، بولات ۇسەنباۆتىڭ (الماتى) «ابايناما»، ۇلاربەك نۇرعالىمنىڭ (نۇر- سۇلتان) «عاسىرلاردىڭ مىنبەرىندە - ۇلى اباي» اتتى ولەڭدەر توپتاماسىنا بەرىلدى.
بەس ىنتالاندىرۋ سىيلىعى سەرىك ءابىل ۇلىنىڭ (نۇر- سۇلتان) «اباي بول»، شامەلحان بۇحاتحاننىڭ (نۇر- سۇلتان) «ءبىر قونىپ قايتايىنشى جيدەبايعا»، جىگەر نىسانوۆتىڭ (اقتوبە) «ءتىرى جۇرەك»، قايرات زەكەن ۇلىنىڭ (سەمەي) «ابايعا جۇگىن»، بالتابەك نۇرعاليەۆتىڭ (الماتى) « ۇلىلىق» اتتى ولەڭدەرىنە بۇيىردى.
ءمۇشايراعا قاتىسقان اۆتورلاردىڭ بارلىعىنا ريزاشىلىعىمىزدى بىلدىرە وتىرىپ، جۇلدىزى جانعان جىرلارىمەن قۇتتىقتايمىز. ۇلى ابايدىڭ ارداقتى اتى ۇرپاقتان- ۇرپاققا جاڭعىرا بەرمەك. التى الاشقا ورتاق وسىناۋ ءدۇبىرلى توي قۇتتى بولسىن، اعايىن!
ۇيىمداستىرۋ القاسى