ءسوز اراسىندا دەپۋتات ازات پەرۋاشەۆ 2016 - جىلى «الاش» ۇلت- ازاتتىق قوزعالىسىنىڭ نەگىزىن قالاۋشى، الاشوردا ۇكىمەتىنىڭ ءتوراعاسى ءاليحان بوكەيحاننىڭ 150 جىلدىعى، ال 2017 - جىلى «الاش» ۇلت-ازاتتىق قوزعالىسىنىڭ 100 جىلدىعى ەكەنىن ەسكە سالدى.
«الاش» ۇلت- ازاتتىق قوزعالىسىنىڭ قىزمەتى، جالپى الاش يدەياسى قازاق قوعامىن ەۋروپا جولىمەن جاڭعىرتۋدى باستى باعىتتارىنىڭ ءبىرى رەتىندە ۇستانعان، سول زاماننىڭ ناقتى جاعدايلارىنا بەيىمدەپ، ۇلتتىق مەملەكەتتىلىكتى قالىپتاستىرۋعا ۇمتىلعانىن جۇرتشىلىق بايىپتاپ كەلەدى. پاريجدەگى يۋنەسكو اتقارۋشى كەڭەسىنىڭ قاراشا ايىنا بەلگىلەنگەن ۇيىمنىڭ باس كونفەرەنسياسىندا قابىلداۋ ءۇشىن جولدانعان ۇسىنىستاردىڭ ىشىندە 2016 - جىلى قوعام جانە مەملەكەت قايراتكەرى ءاليحان بوكەيحاننىڭ 150 جىلدىعىن يۋنەسكو كولەمىندە اتاپ ءوتۋ جايىنىڭ قاراستىرىلۋى دا وسىنىڭ ايعاعى. بۇل الاش مۇراسىن الەمدىك دەڭگەيگە شىعارىپ، ناسيحاتتاۋدىڭ تاپتىرمايتىن مۇمكىندىگى تۋىپ تۇر دەگەن ءسوز»، - دەدى ا. پەرۋاشەۆ.
بۇل رەتتە دەپۋتات ەلباسى ن. نازاربايەۆ جاريالاعان ماڭگىلىك ەل يدەياسى اياسىندا الاش جولىن ەلىمىزدە دە، حالىقارالىق دەڭگەيدە دە زەردەلەي ءتۇسۋ كەرەكتىگىن العا تارتادى.
«پرەزيدەنت ن. نازاربايەۆ «تاريح تولقىنىندا» اتتى كىتابىندا: «ⅩⅩ عاسىردىڭ باسىنداعى قازاق قوعامىنداعى زيالى قاۋىم قالىپتاسۋىنىڭ ۇرپاقتار ەستافەتاسى سەكىلدى سيپاتى بولعانىن اتاپ ايتقان ابزال»، - دەپ كورسەتكەن بولاتىن. سوندىقتان دا، ءاليحان بوكەيحاننىڭ 150 جىلدىعىن لايىقتى اتاپ وتكىزۋ جونىندە مەملەكەتتىك كوميسسيا قۇرۋ قاجەت دەپ سانايمىز. ونىڭ نەگىزگى ماقساتى جاي عانا توي تويلاۋ ەمەس، وي ويلاۋمەن، ارتىنان ءىز قالاتىن تانىمدىق-تاعىلىمدىق تۇرعىدان ۇلتىمىزدىڭ، مەملەكەتىمىزدىڭ رۋحىن كوتەرەتىن، قوعامدىق ساناعا سىلكىنىس تۋدىراتىن مازمۇندى شارالاردى ىسكە اسىرۋدى قامتاماسىز ەتۋ بولۋى ءتيىس»، - دەدى ازات پەرۋاشەۆ.