كىشكەنتاي استانالىقتار سپورتپەن شۇعىلدانىپ، ءتۇرلى كونكۋرستارعا قاتىسادى، تالىمگەرلەرىمەن بىرگە اشىق اۋادا تىنىعادى، دەپ حابارلادى ەلوردا اكىمدىگىنىڭ باسپا ءسوز قىزمەتى.
لاگەردە كۇن تاڭعى جاتتىعۋدان باستالادى. بالالاردى سپورت پەن دەنە شىنىقتىرۋعا باۋلۋ ءۇشىن سالاۋاتتى ءومىر سالتىنا باسا نازار اۋدارىلادى. سونىمەن قاتار، ولاردىڭ شىعارماشىلىق قابىلەتتىلىكتەرى دە دامىتىلادى. ءاربىر كۇن بەلگىلى ءبىر قىزىقتى تاقىرىپقا ارنالادى.
- مۇندا كەش ۇيىقتايسىڭ، اۋا تازا، ادەمى. قالادا ماشينالار كوپ، بيىك ۇيلەر. كۇن سايىن وتەتىن بي كەشتەرىن ۇناتامىن. كوڭىلدى، مىسالى، كەشە جاتار جاتقانشا «تاڭقۋراي كۇنى» ءوتتى، - دەيدى كاميلا احمەدجانوۆا.
«ارمان» لاگەرىنە دەمالۋعا استانا قالاسىنىڭ ارنايى كوررەكسيالىق مەكتەپ- ينتەرناتىنىڭ دا شاكىرتتەرى كەلدى. مۇندا ولار دوس بولۋدى، ءبىرىن- ءبىرى ءتۇسىنۋدى جانە قوعامدا ءومىر ءسۇرۋدى ۇيرەنەدى.
- ولاردى دا ويىندارعا تارتۋعا تىرىسامىز، ارينە، ەگەر قيىن تاپسىرمالار بولسا، ولارعا وڭايلارىن بەرەمىز، ءبىراق باسقا بالالاردىڭ جانىندا بولاتىنداي. ولاردى ءبولىپ تاستامايمىز، ولار دا ساۋ بالالاردىڭ ىستەگەنىن ىستەپ، ورىنداۋ كەرەك، - دەيدى «ارمان» لاگەرىنىڭ ءبىرىنشى ماۋسىمىنداعى اعا تاربيەشى ءجاننات ابەنوۆا.
بالالار تابيعات اياسىنداعى دەمالىستىڭ ەڭ ۇزدىك ەكەندىگىن ءبىراۋىزدان قۇپتادى. جالپى، لاگەردە بەس ماۋسىم وتكىزىلمەك. وسى ۋاقىتتىڭ ىشىندە مۇندا 1500 استام ەلوردالىق بالعىن تىنىعادى. سونىڭ ىشىندە 1000 بالا - حالىقتىڭ وسال توپتارىنا جاتادى، ولار ءۇش ماۋسىم بويى لاگەردە تەگىن دەمالادى.