بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«ت م د مەملەكەتتەر باسشىلارىنىڭ كەڭەسى - دوستاستىقتىڭ جوعارى ورگانى، وندا ۇيىم قىزمەتىنىڭ نەگىزگى ماسەلەلەرى تالقىلانادى جانە شەشىلەدى. ت م د سامميتى قازاقستاننىڭ وسى ۇيىمعا ءتوراعالىق ەتۋى اياسىنداعى باستى وقيعالاردىڭ ءبىرى بولماق. بۇل ماڭىزدى شاراعا پاندەميادان كەيىنگى كەزەڭدە العاش رەت وفلاين رەجيمدە ت م د قۇرامىنداعى بۇكىل مەملەكەتتەردىڭ باسشىلارى قاتىسادى»، - دەدى ايبەك سمادياروۆ مينيسترلىكتە وتكەن بريفينگتە.
بۇل شاراعا ازەربايجان، ارمەنيا، بەلارۋس، قىرعىزستان، رەسەي، تۇرىكمەنستان، تاجىكستان، وزبەكستان باسشىلارى، سونداي-اق اتقارۋ كوميتەتىنىڭ ءتوراعاسى – ت م د اتقارۋشى حاتشىسى قاتىسادى دەپ كۇتىلىپ وتىر.
سامميتتە سوڭعى جىلدارى ت م د جەلىسى بويىنشا ءىس-شارالارعا قاتىسۋدى توقتاتقان ۋكراينا وكىلى بولمايدى.
سونداي-اق، مولدوۆا باسشىسى جۇمىس كەستەسىنىڭ تىعىزدىعىنا بايلانىستى قاتىسا المايدى.
«ءىس-شارا بارىسىندا دوستاستىق الاڭىنداعى ءوزارا ءىس-قيمىلدىڭ وزەكتى ماسەلەلەرىن تالقىلاۋ، ساۋدا-ەكونوميكالىق، مادەني-گۋمانيتارلىق سالالارداعى، سونداي-اق قاۋىپسىزدىك سالاسىنداعى ينتەگراتسيالىق بايلانىستاردى ودان ءارى دامىتۋعا جانە نىعايتۋعا باعىتتالعان ءبىرقاتار قۇجاتتاردى قاراۋ جانە قابىلداۋ جوسپارلانۋدا. اتاپ ايتقاندا، قاۋىپسىزدىك سالاسىنداعى ءوزارا ءىس-قيمىلدى ودان ءارى نىعايتۋ ماقساتىندا مەملەكەت باسشىلارى 2023-2025-جىلدارعا ارنالعان تەرروريزم مەن ەكسترەميزمگە قارسى كۇرەستەگى ىنتىماقتاستىقتىڭ كەزەكتى باعدارلاماسىن بەكىتەدى»، - دەدى ا. سمادياروۆ.
ينتەگراتسيالىق ءوزارا ءىس-قيمىلداعى مادەني قۇرامداس بولىكتىڭ ەرەكشە ءرولى تۇرعىسىنان مەملەكەت باسشىلارى قازاقستان باستاماسى بويىنشا مادەنيەت سالاسىنداعى ىنتىماقتاستىقتى دامىتۋ تۋرالى مالىمدەمە قابىلداۋدى جوسپارلاپ وتىر.
سونداي-اق، سايلاۋ ورگاندارىنىڭ جەلىسى، سىبايلاس جەمقورلىققا قارسى ءىس-قيمىل ماسەلەلەرى بويىنشا ءوزارا ءىس-قيمىلدى كوزدەيتىن ءبىرقاتار حالىقارالىق شارتتارعا قول قويىلادى.
«سونىمەن قاتار، سامميتتە 2023-جىلى ت م د- عا ءتوراعالىق ەتۋدى قىرعىز رەسپۋبليكاسىنا تاپسىرۋ جانە بىشكەك قالاسىندا مەملەكەت باسشىلارى كەڭەسىنىڭ كەزەكتى وتىرىسىن وتكىزۋ تۋرالى شەشىم قابىلداۋ جوسپارلانۋدا. مەملەكەت باسشىسى ەلىمىزدىڭ ت م د- عا ءتوراعالىعىن قورىتىندىلايدى دەپ كۇتىلۋدە»، - دەدى رەسمي وكىل.