قازاقستانداعى باعانىڭ ءوسۋى مامىردا 14 پايىزعا دەيىن ۇلعايعان
بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى قازاقپارات ءتىلشىسى.
«2022 -جىلعى مامىردا قازاقستانداعى ينفلياتسيا جىلدىق ماندە بيىلعى ساۋىردە 13,2 پايىزدان 14 پايىزعا دەيىن قارقىن الدى. ايلىق ينفلياتسيا ساۋىردەگى 2 جانە ناۋرىزداعى 3,7 پايىزعا قاراعاندا، مامىردا 1,4 پايىزعا باياۋلادى. ءبىراق ءالى دە جوعارى جانە وتكەن جىلعى كورسەتكىشتەر مەن ورتاشا جىلدىق ماندەردەن اسىپ وتىر. ايلىق ينفلياتسيانىڭ باياۋلاۋ قارقىنى ءبىر جاعىنان وڭ فيسكالدىق يمپۋلس اياسىنداعى تۇراقتى ىشكى سۇرانىستى، ەكىنشى جاعىنان جوعارى ينفلياتسيالىق كۇتۋلەردى كورسەتەدى»، - دەدى ۇلتتىق بانك ءتوراعاسى.
ونىڭ ايتۋىنشا، جىلدىق ماندە 19 پايىزعا جەتكەن تاماق ونىمدەرى باعاسىنىڭ ءوسۋى ينفلياتسياعا ەڭ كوپ ۇلەس قوسىپ وتىر.
«سىرتقى ينفلياتسيالىق جاعداي ازىق-تۇلىككە جاتپايتىن تاۋارلاردىڭ باعاسىنا جوعارى قىسىم كورسەتۋدە، ولاردىڭ ءوسۋى 11,1-دەن 11,9 پايىزعا دەيىن قارقىن الدى. اقىلى قىزمەتتەردىڭ ينفلياتسياسى رەتتەلەتىن قىزمەتتەر باعاسىنىڭ وسۋىنە ەنگىزىلگەن موراتوريدىڭ تەجەۋشى اسەرىنە قاراماستان 8,9-دان 9,1 پايىزعا دەيىن ءوستى»، - دەدى عالىمجان ءپىرماتوۆ.