الەمدىك تۋريزم 14 ميلليارد دوللاردان ايىرىلۋى مۇمكىن

نۇر-سۇلتان.قازاقپارات - الەمنىڭ ءبىرقاتار ەلىندە ەپيداحۋال جاقساردى. سوعان بايلانىستى شەتەلدىك ساياحاتشىلار ەسەبىنەن پايدا تابۋعا ۇيرەنگەن مەملەكەتتەر تۋريستىك ماۋسىمعا زور ءۇمىت ارتقان ەدى.

الايدا ەندى عانا قالپىنا كەلە باستاعان يندۋستريا جاڭا قيىندىقتارعا تاپ بولدى. رەسەي مەن ۋكراينا اراسىنداعى قاقتىعىس دۇنيەجۇزىلىك تۋريزم سالاسىنىڭ دامۋىنا تۇساۋ سالاتىن ءتۇرى بار. ەندى تۋريستىك مەملەكەتتەر قانداي قادامعا بارادى؟

ۋكرايناداعى شيەلەنىس سالدارىنان الەمدىك تۋريزم يندۋسترياسى 14 ميلليارد دوللاردان قاعىلۋى مۇمكىن. دۇنيەجۇزىلىك تۋريزم ۇيىمى وسىلاي دەپ بولجاپ وتىر. ونىڭ بىرنەشە سەبەبى بار. ماسەلەن، قازىر ۋكراينا اسپانى حالىقارالىق ساپارلار ءۇشىن جابىق تۇر. كوپ ەل رەسەيمەن اۋە قاتىناسىن توقتاتقان. مەملەكەتكە سالىنعان شەكتەۋ شارالارى تاعى بار. بۇل سانكتسيالار وزگە ەلدەرگە دە اسەر ەتىپ وتىر. ماسەلەن، سونىڭ كەسىرىنەن قازىر ەۋروپادا ينفلياتسيا دەڭگەيى ءورشىپ، تۇرعىنداردىڭ دەمالىسقا اقشاسى جەتپەي جاتىر. پاندەمياعا دەيىن رەسەيلىكتەر چەحياعا ەڭ كوپ باراتىن 5 ەل ازاماتتارىنىڭ قاتارىندا بولعان. الايدا قازىر تۋريستىك ۆيزالار بەرىلمەيدى. ال يتاليانىڭ تۋريزم سەكتورى رەسەيلىكتەردىڭ جوقتىعىنان بيىل 150 ميلليون ەۋرودان قاعىلۋى مۇمكىن.

تۇركياعا رەسەيدەن 2 ەسە از دەمالۋشى كەلۋى مۇمكىن

بيىل تۇركيا رەسەيدەن 7 ميلليون دەمالۋشىنى كۇتكەن. الايدا ساراپشىلار بۇل كورسەتكىش ەكى ەسە از بولۋى مۇمكىن دەپ توپشىلاپ وتىر. ال ەگيپەت بيلىگى قازىردىڭ وزىندە تۋريستەر اعىنى 40 پروتسەنتكە كەمىگەنىن ايتادى. ويتكەنى ۋكراينالىق ساياحاتشىلار جوق. رەسەيدەن دە كەلۋشىلەر ءبىرشاما ازايعان.

بيىل يزرايلدە ساياحاتشى از بولادى

يزرايل بيلىگى دە بيىل تۋريستەر سانى بۇرىنعىدان از بولاتىنىن بولجايدى. ويتكەنى مۇندا دەمالۋعا كەلەتىندەردىڭ وندىعىنا رەسەي مەن ۋكراينا ازاماتتارى كىرەتىن. الايدا قازىرگى احۋالعا بايلانىستى ساراپشىلار بيىل ولاردىڭ سانى از بولادى دەيدى. ونىڭ ۇستىنە بۇرىندارى قىتايدان كەلەتىن دەمالۋشىلار دا كوپ بولعان. ءبىراق ەلدە قازىر ەپيداحۋال ۋشىعىپ تۇر. سوندىقتان قىتايلىقتاردىڭ باسقا مەملەكەتكە شىعۋ ەرەجەلەرى قاتاڭداتىلعان.

تايلاند بيلىگى كەرىسىنشە كەيىنگى ۋاقىتتا ساياحاتشىلار كوبەيگەنىن ايتادى. وعان 1-ساۋىردەن باستاپ كوروناۆيرۋسقا قاتىستى شەكتەۋ شارالارىنىڭ الىنىپ تاستالۋى سەبەپ. ناتيجەسىندە وتكەن دەمالىس كۇندەرى بانگكوك اۋەجايىنا كەلگەن شەتەلدىكتەر سانى پاندەمياعا دەيىنگى دەڭگەيگە جەتۋگە از قالدى. كەلەسى اپتادا مۇندا سونگكران مەرەكەسى، ياعني تاي جاڭا جىلى اتاپ وتىلەدى. بيلىك سول كەزدە شەتەلدىكتەر سانى تاعى دا ارتادى دەپ ۇمىتتەنىپ وتىر.

اۆتورى: جۇلدىز اتاگەلدييەۆا

www.24.kz