تەمەكى شەگەتىن ادامداردا كوروناۆيرۋستىڭ اسقىنۋ قاۋپى 14 ەسە جوعارى بولادى - زەرتتەۋ
20:52, 21 - ءساۋىر 2020
نۇر- سۇلتان. قازاقپارات – حالىقارالىق عالىمدار توبى كوروناۆيرۋستىڭ كوبىنەسە تەمەكى شەگەتىن ادامداردا اسقىناتىنىن جانە ولاردا ءولىم قاۋپى جوعارى بولاتىنىن مالىمدەدى.
بۇل تۋرالى Medical Xpress حابارلادى.
ماماندار قىتايلىق كلينيكادا 73 پاتسيەنتتىڭ جاعدايىن زەرتتەگەن. زەرتتەۋ كورسەتكەندەي، تەمەكى شەگەتىن ناۋقاستاردا COVID-19-دىڭ اسقىنۋ ىقتيمالدىعى 14 ەسە جوعارى بولادى. «كوروناۆيرۋس نەگىزىنەن وكپەگە اسەر ەتەتىندىكتەن، تىنىس الۋ جۇيەسىن السىرەتەتىن كەز- كەلگەن نارسە اسقىنۋ قاۋپىن ارتتىرادى»، - دەيدى زەرتتەۋگە قاتىسۋشىلاردىڭ ءبىرى، دارىگەر مەتيۋ ستەليگا.
دارىگەر تەمەكى شەگۋ تىنىس الۋ جولدارىنىڭ شىرىشتى قاباتىن قالىڭداتاتىنىن، ودان سوڭ دەممەن جۇتىلعان باكتەريالار مەن ۆيرۋستاردى جويۋدى قيىنداتاتىنىن ايتتى. ءتىپتى تەمەكى ءتۇتىنىن كەزدەيسوق جۇتۋ دا قاۋىپ تۋدىرادى.
www.24.kz