قازاقستان يراكتان 14 بالانى قايتارىپ الماق

نۇر-سۇلتان. قازاقپارات - ەلوردادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ە ق ى ۇ) اۋعانستان بويىنشا جيىنى ءوتىپ جاتىر، دەپ حابارلايدى قازاقپارات ءتىلشىسى.

«2019 -جىلدىڭ باسىندا قازاقستان ارنايى «جۋسان» وپەراتسياسىن جۇرگىزگەن بولاتىن. «جۋسان» وپەراتسياسى - قازاقستان وسى ادامداردىڭ (كەزىندە سيرياعا كەتىپ قالعان ازاماتتاردىڭ - اۆت.) ءۇيى ەكەنىن كورسەتتى.

وپەراتسيانىڭ ارقاسىندا ەلگە 600 گە تارتا ادام قايتارىلدى. ولاردىڭ 406 ى بالا. ولاردىڭ ءبارى دە وڭالتۋ شارالارىنان ءوتىپ، قازاقستاندىق قوعامعا بەيىمدەلدى. قازىرگى ۋاقىتتا يراكتان 14 بالانى قايتارۋ باعىتىندا جۇمىس جۇرگىزىپ جاتىرمىز. ولاردىڭ انالارى سول جاقتا ءومىر بويى باس بوستاندىعىنان ايىرىلعان»، - دەدى ق ر سىرتقى ىستەر ءمينيسترى مۇحتار تىلەۋبەردى وتىرىس بارىسىندا.

ءمينيستردىڭ ايتۋىنا قاراعاندا، قازاقستان مۇنداي گۋمانيتارلىق اكسيالاردى جۇرگىزىپ جاتقان الەمدەگى ساناۋلى مەملەكەتتەردىڭ ءبىرى.

«ءبىز ءوز تاجىريبەمىزبەن بولىسۋگە دايىنبىز»، - دەدى ول.

ەسكە سالايىق، «جۋسان» گۋمانيتارلىق وپەراتسياسى - اۋقىمدى اكسيا. بۇل باستامانى تۇڭعىش پرەزيدەنت - ەلباسى نۇرسۇلتان نازاربايەۆ ۇسىندى. 2018 -جىلدان بەرى جۇزەگە اسىرىلىپ كەلەدى.

سيريادان قازاقستاندىقتاردىڭ العاشقى لەگى بيىلعى 6 -قاڭتاردا ەلگە جەتكىزىلگەن بولاتىن.

7-9 -مامىر كۇندەرى اتالمىش ەلدەن قازاقستاننىڭ تاعى 231 ازاماتى ورالدى.

كەشەندى شارالار ناتيجەسىندە قاقتىعىس ايماعىنان ەلىمىزگە جالپى 357 بالا قايتارىلدى. 28-31 -مامىردا «جۋسان» ارنايى گۋمانيتارلىق اكسياسىنىڭ سوڭعى كەزەڭى وتكىزىلگەن ەدى.

اۆتور: ايان بەكەن ۇلى