استانادا 14 بالانىڭ قىزىلشامەن اۋىرعانى راستالدى
استاناداعى جۇقپالى بالالار اۋرۋحاناسىنا تاۋلىگىنە 200 گە دەيىن بالالار كەلىپ قارالۋدا.
«وتكەن اپتادا جەدەل رەسپيراتورلى ۆيرۋستىق ينفەكتسيامەن اۋىرعاندار كوبەيدى. بارلىق ناۋقاستار بورتپە جانە قىزىلشا جۇقپالى اۋرۋلارىنا قارسى تەكسەرىلدى. ول اۋرۋلاردىڭ بەلگىلەرى بايقالعان جاعدايدا بىردەن اۋرۋحاناعا جاتقىزىلدى. بۇگىنگى تاڭدا اۋرۋحانادا قىزىلشا دياگنوزى بار دەگەن 41 ناۋقاس بولسا، ونىڭ ىشىندە 14 ناۋقاستىڭ دياگنوزى زەرتحانادا راستالدى»، - دەدى قالالىق بالالار جۇقپالى اۋرۋلار اۋرۋحاناسى باس دارىگەرىنىڭ مەديتسينالىق ءبولىم جونىندەگى ورىنباسارى ولگا پۋشكاريەۆا.
قابىلداۋ بولىمىندەگى دارىگەر ناۋقاستىڭ دەنە قىزۋى، تىنىس الۋى، جۇرەگىنىڭ سوعۋى سەكىلدى ومىرىنە قاۋىپ توندىرەتىن پارامەترلەر بويىنشا 3 جولاقتىڭ قايسىسىنا جاتاتىنىن انىقتايدى. قىزىل جولاقتاعى بالالاردىڭ جاعدايى اۋىر، تەز ارادا دارىگەردىڭ كومەگىنە جۇگىنۋ قاجەت دەگەندى بىلدىرەدى. ولار دەرەۋ دارىگەردىڭ قابىلداۋىنا بارادى. سارى جولاقتاعىلاردى كەزەگى كەلگەندە دارىگەر قابىلدايدى. ال جاسىل جولاققا تۇسكەندەردىڭ ومىرىنە ەشقانداي قاۋىپ جوق، دارىگەردىڭ كەڭەسىن الىپ، كوپ جاعدايدا ۇيىنە جىبەرىلەدى.
«بىرىنشىدەن، اۋرۋحاناداعى ناۋقاستارعا ەكپە ەگىلمەگەن. ءبىر جاسقا دەيىنگى بالالارعا قاتىستى جوسپارلى ەكپە جىلىنا جانە 6 جاسقا دەيىنگى ريەۆاكتسيناتسيا جۇرگىزىلەدى. سوندىقتان ءبىر جاسقا دەيىنگى بالالار ءوز ەكپەلەرىن العان جوق. ال بىردەن اسقان بالالار ءار ءتۇرلى سەبەپتەرمەن باس تارتقان»، - دەدى ول.
ەسكە سالا كەتسەك، ق ر دەنساۋلىق ساقتاۋ مينيسترلىگىنىڭ مالىمەتىنشە، قازاقستاندا 2018-جىلى قىزىلشاعا قاتىستى 26 راستالعان وقيعا تىركەلگەن، ونىڭ ىشىندە 20 جاعدايدا 14 جاسقا دەيىنگى بالالار اۋىرعان.