الماتى وبلىسىندا پاتەرلەرى ورتەنگەن 14 وتباسى باسپانالى بولدى

تالدىقورعان. قازاقپارات - استانانىڭ 20 جىلدىق مەرەيتويى قارساڭىندا جانسۇگىروۆ اۋىلىنىڭ تۇرعىندارى ۇلكەن قۋانىشقا كەنەلدى.

بىلتىر كۇزدە پاتەرلەرى ورتەنىپ، دالادا قالعان 14 وتباسىعا جاڭا ۇيلەردىڭ كىلتتەرى تابىس ەتىلدى، دەپ حابارلايدى قازاقپارات ءتىلشىسى.

قونىس يەلەرىن قۇتتىقتاۋعا الماتى وبلىسى اكىمىنىڭ ءبىرىنشى ورىنباسارى ءلاززات تۇرلاشوۆ ارنايى كەلىپ، كوپشىلىكتىڭ قۋانىشىنا ورتاقتاستى. باسپانالى بولعان تۇرعىندار از ۋاقىتتا جاڭا ءۇي تۇرعىزىپ، يگىلىكتەرىنە تاپسىرعان وبلىس، اۋدان باسشىلىعىنا العىستارىن جەتكىزدى.

بۇل ۇيلەر 100 پايىز وتاندىق قۇرىلىس ونىمدەرىنەن تۇرعىزىلعان. ءاربىرىنىڭ كولەمى 70 شارشى مەتر شاماسىندا. 1 ءۇيدىڭ قۇرىلىسىنا شامامەن 9,5 ميلليون تەڭگە جۇمسالعان. اۋلاسىن اباتتاندىرىپ، قورا- قوپسى سالىپ، ينجەنەرلىك جەلىسىن تارتقانعا 6,5 ميلليون تەڭگە بولىنگەن. سوندا 1 ءۇيدىڭ قۇنى 16 ميلليون، ال 14 ۇيگە 224 ميلليون تەڭگە قارجى كەتكەن.

 

ەستەرىڭىزگە سالا كەتەيىك، بىلتىر قازان ايىندا اقسۋ اۋدانىنا قاراستى ءى. جانسۇگىروۆ اۋىلىندا 2 قاباتتى ءۇي ورتەنىپ، 32 ادام قاۋىپسىز جەرگە كوشىرىلگەن بولاتىن. وبلىس ورتالىعىنان 120 شاقىرىم جەردە ورنالاسقان ءى. جانسۇگىروۆ اۋىلىندا ءورت شىققانى تۋرالى حابار تاڭعى ساعات 08:00-دە جەتكەن. ءورت ءسوندىرۋ قىزمەتى وقيعا ورنىنا جەتكەن كەزدە تۇرعىن ءۇيدىڭ شاتىرى تولىق ورتەنىپ، ەكىنشى قاباتتىڭ توبەسى جانا باستاعان. 16 پاتەرلى بۇل ءۇي 1959 -جىلى تۇرعىزىلعان ەكەن.