الماتىدا 14 مىڭنان استام جۇمىسسىز ادام انىقتالدى - اكىم
بۇگىن حالىق الدىندا ەسەپ بەرگەن الماتى اكىمى باۋىرجان بايبەك 2017 -جىلى جۇمىسپەن قامتۋ سالاسىن زاڭداستىرۋ ماسەلەسىندە ءبىرقاتار جۇمىستار اتقارىلعانىن جەتكىزدى.
«قالانىڭ جۇمىسپەن قامتۋ بازاسىندا 235 مىڭ ادامنىڭ الەۋمەتتىك ستاتۋسى وزگەردى. پاتەرىن جالعا بەرگەن، جەكەلەي ادام تاسىمالىمەن جانە بالا وقىتۋمەن اينالىسىپ كەلگەن 22 مىڭعا جۋىق ادام تىركەلىپ، سالىق تولەي باستادى. بۇرىن اقشانى كونۆەرت ارقىلى الىپ كەلگەن 1,5 مىڭعا جۋىق جالدامالى جۇمىسشىلار ەڭبەك شارتىنا وتىرىپ، الەۋمەتتىك قامسىزداندىرۋ باعدارلامالارىنا ەندى. سونىمەن قاتار، ۋاقىتشا جۇمىسسىز 14 500 تۇرعىن انىقتالىپ، تىركەۋگە الىندى. ولاردى جۇمىسقا ورنالاستىرۋدى قامتاماسىز ەتۋ كەرەك»، - دەدى بايبەك.
الماتى اكىمى 2017 -جىلدىڭ قىركۇيەك ايىنان باستاپ، قالالىق جۇمىسپەن قامتۋ ورتالىعى جاڭا فورماتقا اۋىسقانىن ەسكە سالا كەتتى.
«ەندى «ءبىر تەرەزە» جۇيەسى ارقىلى ەڭبەك بيرجاسىنا شىعۋعا بولادى. وندا ەلەكتروندى تۇردە 35 مىڭ بوس جۇمىس ورنى تىركەلگەن. سونداي- اق، اتالعان جۇيە ارقىلى بالا كۇتىمىنە بايلانىستى تولەمدەردى ەلەكتروندى تۇردە رەسىمدەپ، ەڭبەك قاتىناسىن زاڭداستىرۋعا بولادى. جالپى، داعدارىسقا قارسى مەملەكەتتىك باعدارلامالاردىڭ ارقاسىندا بىلتىر 45 مىڭ جۇمىس ورنى قۇرىلدى. بۇل 2016 -جىلمەن سالىستىرعاندا 2 ەسەگە كوپ»، - دەدى مەگاپوليس باسشىسى.
ايتا كەتەيىك، بيىل الماتىدا جول كارتاسى باعدارلاماسى اياسىندا 32 مىڭ ادام جۇمىسپەن قامتىلادى دەپ جوسپارلانعان.