قازاقستاندا جاساندى ۇرىقتاندىرۋ ارقىلى 14 مىڭ بالا دۇنيەگە كەلدى
بۇل تۋرالى بۇگىن ەلوردادا ءوتىپ جاتقان قازاقستاننىڭ رەپرودۋكيۆتى مەديتسينا قاۋىمداستىعىنىڭ 9-حالىقارالىق كونگرەسى بارىسىندا ق ر دەنساۋلىق ساقتاۋ ۆيتسە-ءمينيسترى ءلاززات اقتايەۆا ايتتى، دەپ حابارلايدى قازاقپارات.
«قازاقستاندا قوسالقى رەپرودۋكتيۆتى تەحنولوگيالاردىڭ كومەگىمەن 14 مىڭ بالا دۇنيەگە كەلدى. تەگىن مەديتسينالىق كومەكتىڭ كەپىلدەندىرىلگەن كولەمى اياسىندا 4783 سيكل جاسالىپ، وعان مەملەكەت 3,8 ميلليارد تەڭگە جۇمسادى. ناتيجەسىندە 1532 بالا دۇنيە ەسىگىن اشتى. تولىقتاي العاندا تەگىن مەديتسينالىق كومەكتىڭ كەپىلدەندىرىلگەن كولەمى اياسىنداعى ناتيەجىلىك 32 پايىزدى قۇرادى»، - دەدى ۆيتسە-مينيستر.
ونىڭ دەرەگىنشە، قازاقستاندا 14 مىڭنان استام ايەل مەن 1 مىڭنان ەستام ەركەك بەدەۋلىگىنە بايلانىستى ديسپانسەرلىك ەسەپكە الىنعان.
جالپى ەلىمىزدە وتباسىلاردىڭ 15 پايىزى بەدەۋلىككە ۇشىراعان.
«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، نەكەدەگى مۇنداي بەدەۋلىك كورسەتكىشى پروبلەما بولىپ سانالادى. ويتكەنى، بۇل دەڭگەي دەموگرافيالىق كورسەتكىشكە اسەرىن تيگىزەدى»، - دەدى ول.
ايتا كەتەرلىگى، ەكستراكورپورالدى ۇرىقتاندىرۋدىڭ ارقاسىندا قازاقستاندا ءبىرىنشى بالا 1996-جىلى دۇنيەگە كەلگەن بولاتىن. ال 2010-جىلدان باستاپ ەكستراكورپورالدى ۇرىقتاندىرۋ تەگىن مەديتسينالىق كومەكتىڭ كەپىلدەندىرىلگەن كولەمىنە ەنگىزىلدى جانە ونىڭ كولەمى جىلدان جىلعا ارتىپ كەلەدى. ماسەلەن، 2010-جىلى جىلىنا 100 سيكلگە (جاساندى ۇرىقتاندىرۋ) مەملەكەت قارجى بولەتىن بولسا، اعىمداعى جىلى بۇل كورسەتكىش 900 سيكلگە جەتىپ وتىر.
«كەلەسى جىلعا ارنالعان مەملەكەتتىك تاپسىرىس 2017-جىلعى شەكتە، ياعني 900 سيكل بولادى. قارجىلاندىرۋ كولەمى دە ءدال سونداي»، - دەدى ءلاززات اقتايەۆا.
اۆتور: مارلان جيەمباي