استانادا جەتى ايدا 146 مىڭعا جۋىق شەتەل ازاماتى ءتولقۇجات الدى
بۇل تۋرالى قالالىق پولتسيا دەپارتامەنتى كوشى-قون قىزمەتى باسقارماسىنىڭ باسشىسى ەربول ماحمەتوۆ ءمالىم ەتتى، دەپ حابارلايدى قازاقپارات ءتىلشىسى.
«شەتەل ازاماتتارىنا جەكە باسىن كۋالاندىراتىن قۇجاتتاردى بەرۋ مەحانيزمى جەتىلدىرىلىپ كەلەدى. بيىل 7 ايدا شەتەل ازاماتتارىنا 145 مىڭ 965 تۇلقۇجات (پاسپورت) پەن جەكە كۋالىك ازىرلەنىپ، بەرىلدى. قۇجاتتاردى دايىنداۋعا كەتەتىن ۋاقىت قىسقارتىلدى (جالپى تارتىپپەن 20 جۇمىس كۇنى، جەدەلدەتىلگەن تارتىپتە 1 جانە 3 جۇمىس كۇنىندە دايىن بولادى). سونىمەن قاتار «ازاماتتارعا ارنالعان ۇكىمەت» مەملەكەتتىك كورپوراتسيامەن بىرلەسە وتىرىپ ءوز بەتىنشە ءجۇرىپ-تۇرۋى قيىنعا سوعاتىن 128 ازاماتتىڭ ۇيىنە بارىپ قۇجاتتار راسىمدەلدى»، - دەدى ەربول ماحمەتوۆ پوليتسيا دەپارتامەنتىندە وتكەن باسپا ءسوز ءماسليحاتىندا.
سونداي-اق سپيكەر ەندىگى ۋاقىتتا شەتەل ازاماتتارىنان كەيبىر قۇجاتتىڭ تالاپ ەتىلمەيتىنىن ايتتى.
«ىشكى ىستەر مينيسترلىگىنىڭ اقپاراتتىق جۇيەلەرىن ا ح اج -بەن ينتەگراتسيالاۋ ارقىلى جالعان قۇجاتتاردى انىقتالادى. سونىمەن قاتار قۇجاتتار ازىرلەۋدە، بەرۋدەگى اكىمشىلىك جانە باسقا دا كەدەرگىلەر دە جويىلادى. ءبىز ازاماتتاردان تەگىن، تۋعان كۇنى مەن تۋعان جەرىن، ازاماتتىعى جانە باسقا دا ايقىندامالىق دەرەكتەرىن وزگەرتكەنى تۋرالى قۇجاتتارىن تالاپ ەتپەيمىز. بيىلدان باستاپ جەكە باسىن كۋالاندىراتىن قۇجاتتاردى العان نەمەسە اۋىستىرعان كەزدە ساۋساق ءىزىن ەنگىزۋدى جۇزەگە اسىرۋ جوسپارلانىپ وتىر. بۇل جالعان قۇجاتپەن كۇرەستە جۇمىستى جەڭىلدەتەدى»، - دەيدى ول.