الەۋمەتتىك تولەمدەر مەن ەڭبەك سالاسىنا قاتىستى كەڭەس بەرەتىن call-ورتالىق قىزمەتكەرلەرى بۇدان بىلاي اتاۋلى الەۋمەتتىك كومەك پەن الەۋمەتتىك قىزمەتتەر پورتالىنىڭ جۇمىسىنا قاتىستى ساۋالدارعا، سونداي-اق info@info.mintrud.kz ەلەكتروندى پوشتاسىنا كەلىپ تۇسەتىن حاتتارعا دا جاۋاپ بەرەدى.
«بۇگىندە 1411 بايلانىس ورتالىعىنا ورتاشا ەسەپپەن بەس مىڭ قوڭىراۋ كەلىپ تۇسەدى. ازاماتتار دەمالىس جانە مەرەكە كۇندەرى دە قوڭىراۋ شالىپ، ءوز ساۋالدارىنا جاۋاپ الا الادى. جىل باسىنان بەرى 22 مىڭ قوڭىراۋ كەلىپ تۇسسە، ولاردىڭ باسىم بولىگى زەينەتاقى جانە الەۋمەتتىك قامسىزداندىرۋ، كوپ بالالى انالاردىڭ اي سايىنعى جاردەماقىسى، اتاۋلى الەۋمەتتىك كومەك ماسەلەلەرىن قامتيدى. قىزمەت الۋشىلار حقو- عا بارماس بۇرىن، 1411 گە حابارلاسىپ، الەۋمەتتىك قىزمەتتەردى راسىمدەۋگە قاجەت قۇجاتتار ءتىزىمىن دە الدىن الا ءبىلىپ وتىرا الادى»، - دەيدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتورايىمىنىڭ ورىنباسارى ءبىرجان ءجۇنىسوۆ.
1411 ءبىرىڭعاي قىسقا نومىرىنە تەگىن قوڭىراۋ شالا وتىرىپ، كەز كەلگەن وپەراتوردان كەلەسى ماسەلەلەرگە قاتىستى جاۋاپ الۋعا بولادى:
- زەينەتاقى مەن جاردەماقى راسىمدەۋ؛
- كوپبالالى وتباسىنىڭ مەملەكەتتىك جاردەماقىسى؛
- اتاۋلى الەۋمەتتىك كومەك؛
- الەۋمەتتىك قىزمەتتەر پورتالى؛
- ەڭبەك قاتىناستارى جانە حالىقتى جۇمىسپەن قامتۋ؛
- مۇگەدەك بالالاردى تاربيەلەپ وتىرعان ادامدارعا ونلاين-پسيحولوگيالىق كونسۋلتاتسيا بەرۋگە وتىنىمدەر قابىلداۋ ماسەلەلەرى.
بۇدان باسقا، الەۋمەتتىك تولەمدەر مەن زەينەتاقى جانە ەڭبەكپەن قامتۋ ماسەلەسىنە قاتىستى نەگىزگى ساۋالداردىڭ جاۋابىن www.info.mintrud.kz سايتى ارقىلى دا بىلۋگە بولادى.