ش ق و-دا تۇڭعىش رەت 140 شاقىرىمدىق ات بايگەسى ءوتتى
ات جارىسى «تۇعىرى بيىك تارباعاتاي» ونەر مەن سپورت فەستيۆالى اياسىندا وتكىزىلدى.
تاڭعى ساعات 4 تە 140 شاقىرىمعا ارنالعان ات بايگەسى باستالدى. قازاقستاننىڭ ءار ايماعىنان كەلگەن 106 شاباندوز كوكپەكتى اۋىلىنان اقسۋات اۋىلىنا دەيىن بايگەگە ءتۇستى. جارىستىڭ شىنايى ءارى ءادىل ءوتۋىن قامتاماسىز ەتۋ ماقساتىندا جىلقىلار GPS جۇيەسىمەن قامتاماسىز ەتىلدى.
قازاق كۇرەسىنەن حالىقارالىق فەدەراتسياسىنىڭ ۆيتسە-پرەزيدەنتى باتىرحان قامىنحان ۇلىنىڭ ايتۋىنشا، بۇل ەلىمىزدە وسىنداي قاشىقتىقتا وتكىزىلىپ وتىرعان تۇڭعىش بايگە.
«بۇگىن شاباندوزدار ءۇشىن ۇلكەن مەرەكە بولدى. جىلقىلار ۇزاق قاشىقتىقتا جوعارى شىدامدىلىقتارىن كورسەتتى»، - دەدى ب. قامىنحان ۇلى.
شاباندوزدار 8 ساعاتتان استام جول ءجۇرىپ ءوتتى. ۇلكەن جارىستىڭ جەڭىمپازى كوكپەكتى اۋدانىنىڭ تۇرعىنى رۋسلان شايارگازين اتاندى.
«بۇگىن ۇلكەن جارىس بولدى. جول ءجۇرۋ بارىسىندا قيىندىقتار بولدى. مەن مىنگەن جۇيرىك قيىنشىلىقتارعا قاراماستان اقتىق مارەگە ءبىرىنشى جەتتى. استىمداعى تۇلپارىمنىڭ جاعدايىن ۇدايى باقىلاپ، توزىمدىلىگىنىڭ ناتيجەسىندە جەڭىمپاز بولدىم دەپ ويلايمىن»، - دەدى قۋانىشىن جاسىرا الماعان شاباندوز.
بۇل كۇن قازاقستاندىق ات سپورتى تاريحىنا ەنەرى ءسوزسىز.
ۇيىمداستىرۋشىلار كوميتەتىنىڭ وكىلى، وبلىستىق دەنەشىنىقتىرۋ جانە سپورت باسقارماسىنىڭ باسشىسى دەنيس رىپاكوۆ:
«ەلىمىزدىڭ شىعىسىندا حالىقارالىق بايگەنىڭ ءوتۋى - قازاقستاندىق ات سپورتىندا ايتۋلى وقيعا. جارىسقا ارنايى دايىندالعان جۇيرىكتەر قاتىسىپ، مارافوندىق شىدامدىلىق تانىتتى. بۇنىڭ بارلىعى ۇلكەن تاباندى ەڭبەك. الداعى ۋاقىتتا بۇل بايگە ءتۇرىن وتكىزۋدى داستۇرگە اينالدىرىپ، ونىڭ اۋقىمىن كەڭەيتەتىن بولامىز»، - دەدى ۇيىمداستىرۋشىلار كوميتەتىنىڭ وكىلى، وبلىستىق دەنەشىنىقتىرۋ جانە سپورت باسقارماسىنىڭ باسشىسى دەنيس رىپاكوۆ.
سونىمەن قاتار، اتالعان فەستيۆال اياسىندا ءار قاشىقتىقتا تاي جارىسى، جورعا جارىسى، تاي بايگە جانە الامان بايگە ءوتتى.