اتىراۋدا قۇربان ايتتا 14 كيىز ءۇي تىگىلىپ، 10 مىڭ بالاعا سىيلىق بەرىلەدى
اتىراۋ وبلىسىنىڭ باس يمامى التىنبەك ۇتىسحان ۇلىنىڭ ايتۋىنشا، ەرتەڭ، 28 -ماۋسىمدا قۇربان ايت مەيرامىنىڭ العاشقى كۇنى كەڭ اۋقىمدا اتالىپ وتەدى.
«قاسيەتتى قۇربان ايت ەلدىڭ بىرلىگىن نىعايتىپ، ءوزارا باۋىرلاستىقتى ارتتىرادى. ايت كۇندەرى شاماسى جەتكەن ادام قۇرباندىق شالادى. بيىل اتىراۋ قالاسىنداعى يساتاي- ماحامبەت ورتالىق الاڭىندا قۇربان ايت مەرەكەسىنە وراي 14 كيىز ءۇي تىگىلەدى. جەرگىلىكتى ونەرپازدار ونەر كورسەتەدى. تۇرعىندار ايتىسكەرلەر مەن كۇيشىلەردىڭ ونەرىن تاماشالايدى»، - دەدى التىنبەك ۇتىسحان ۇلى.
اتىراۋ وبلىسىندا ايت نامازى جەرگىلىكتى ۋاقىتپەن تاڭعى ساعات 6:30 دا وقىلادى. سودان سوڭ بۇقارالىق سيپاتتاعى اۋقىمدى ءىس- شارالاردى وتكىزۋ جوسپارلانعان.
«قۇربان ايت مەيرامىنا وراي وڭىردەگى مەشىتتەر 10 مىڭ بالاعا ارنايى سىيلىق ۇلەستىرەدى. نيەت ەتىپ، شالىنعان قۇربان مالىنىڭ ەتى الەۋمەتتىك تۇرمىسى تومەن توپتاعى وتباسىلارعا تاراتىلادى»، - دەپ ءمالىم ەتتى ا. ۇتىسحان ۇلى.
باس يمامنىڭ دەرەگىنە سۇيەنسەك، مەرەكە كۇندەرى اتىراۋ قالاسىنداعى كوكارنا ەلدى مەكەنى مەن «سارىقامىس» شاعىناۋدانىندا، «اتىراۋ- دوسسور» باعىتىندا قاتىنايتىن تاسجولدىڭ بويىنداعى «جۇلدىز» جانە «بىرلىك» شاعىناۋداندارىنىڭ قيىلىسىنداعى ارنايى ورىندا مال ساتىلادى. ال قۇرباندىققا شالىناتىن مال «ادال»، «اسىل- اگرو»، «تۋما بازارى» مال بازارلارىندا، «اتىراۋ ەت ورتالىعى» مەن «قۋانىش» جەكە كاسىپكەرلىگىنىڭ الاڭىندا سويىلادى.
ەسكە سالا كەتەلىك، وتكەن جىلى اتىراۋدا قۇربان ايتتىڭ ءبىرىنشى كۇنى قوي باعاسى 120 مىڭ تەڭگەگە دەيىن كوتەرىلگەن بولاتىن.