ەلىمىزدەگى 13 وبلىستا سۋ تاسقىنى قاۋپى جوعارى
«الدىن الا بولجامعا سايكەس ناۋرىز ايىندا رەسپۋبليكانىڭ باسىم بولىگىندە اۋا تەمپەراتۋراسى كليماتتىق نورماعا جاقىن بولادى. باتىس وڭىرلەردە 1 گرادۋس نورمادان جوعارى، ال ەلدىڭ سولتۇستىك- شىعىس، ورتالىعىندا جانە وڭتۇستىك ايماقتاردىڭ سولتۇستىگىندە 1 گرادۋس نورمادان تومەن. ناۋرىز ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورمادان تومەن، سولتۇستىك قازاقستان، شىعىس قازاقستان وبلىستارىندا، اقمولا، پاۆلودار، اباي وبلىسىنىڭ باسىم بولىگىندە، قوستاناي وبلىسىنىڭ سولتۇستىك- شىعىسىندا، الماتى وبلىسىنىڭ وڭتۇستىك- شىعىسىندا، جەتىسۋ اۋماقتارىندا نورماعا جۋىق بولجانادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ۆيتسە-ءمينيستردىڭ ايتۋىنشا، قارداعى سۋ قورىنىڭ مولشەرىن، توپىراقتىڭ كۇزگى ىلعالدىلىعىن، توپىراقتىڭ قاتۋ تەرەڭدىگىن قاراستىرا وتىرىپ، سۋ تاسقىنى قاۋىپتى ايماقتارعا الدىن- الا باعا بەرىلدى.
«جوعارى قاۋىپ: قاراعاندى، اقمولا، سولتۇستىك قازاقستان، قوستاناي، شىعىس قازاقستان، اباي، اقتوبە، باتىس قازاقستان، اتىراۋ الماتى، جەتىسۋ، جامبىل، تۇركىستان وبلىستارى. ورتاشا قاۋىپ: پاۆلودار، ۇلىتاۋ، ماڭعىستاۋ جانە قىزىلوردا وبلىستارى»، - دەدى عاليدوللا ازيدۋللين.