ريم پاپاسىنىڭ ەلورداداعى مەسساسىنا 13 ەلدەن ادامدار قاتىستى
الەمدىك جانە ءداستۇرلى دىندەر ليدەرلەرىنىڭ VII سەزىن ۇيىمداستىرۋشىلاردىڭ مالىمەتىنشە، ءدىني راسىمگە كەز كەلگەن ءدىن مەن كونفەسسيانىڭ وكىلى قاتىسا الدى. حالىق ءۇشىن 5 مىڭ وتىراتىن، 1,7 مىڭ تۇرىپ تىڭدايتىن ورىن دايىندالدى. بارلىق ورىن تولعان.
«قاسيەتتى كرەستىڭ كوتەرىلۋ مەرەكەسىنە باعىشتالعان مەسساعا رەسپۋبليكا وڭىرلەرىنەن، الىس جانە جاقىن شەتەلدەردەن مىڭداعان قاجى قاتىستى. شەت ەلدەردىڭ گەوگرافياسى مىناداي: رۋمىنيا، گەرمانيا، پولشا، رەسەي، وزبەكستان، قىرعىزستان، موڭعوليا، ازەربايجان، گرۋزيا، تۇرىكمەنستان، بەلارۋس، تاجىكستان»، - دەلىنگەن ۇيىمداستىرۋشىلار حابارلاماسىندا.
ۋاعىزدى باستاماس بۇرىن ريم پاپاسى قوعامدىق ساپارلارعا ارنالعان ءوزىنىڭ ارنايى كولىگى - پاپاموبيلمەن جينالعانداردىڭ الدىنان ءجۇرىپ ءوتتى.
ريم پاپاسى مەسسا بارىسىندا بەيبىتشىلىك پەن ادىلدىكتىڭ زور قۇندىلىعىن اتاپ ءوتتى. ول قارۋلى قاقتىعىستارعا قارسى شىعىپ، قازاقستان رەسپۋبليكاسىنا ءوزىنىڭ ساپارىن ۇيىمداستىرعانى ءۇشىن العىس ءبىلدىردى. سونىمەن قاتار قازاقستان حالقىنا باتاسىن بەرىپ، قاسيەتتى مەسسا توستاعانىن سىيعا تارتتى.
پاپانىڭ ۋاعىزى مەن دۇعاسى ءبىر ساعاتتان استام ۋاقىتقا سوزىلدى. ۋاعىز ماتىنىمەن ۆاتيكاننىڭ رەسمي سايتىنان تانىسۋعا بولادى.
ايتا كەتەيىك، ريم پاپاسىنىڭ قازاقستانعا ساپارى - رۋحاني جانە ساياسي ءمانى بار وتە ماڭىزدى وقيعا. پونتيفيك بۇكىل الەمدە جوعارى بەدەلگە يە، سوعىستاردىڭ، كەدەيلىكتىڭ، گەندەرلىك تەڭسىزدىكتىڭ وتكىر ماسەلەلەرىن كوتەرىپ جۇرەدى. ال ونىڭ پىكىرى مىندەتتى تۇردە تىڭدالادى.
ۆاتيكان مەن ريم- كاتوليك شىركەۋىنىڭ باسشىسى يوانن پاۆەل II -نىڭ قازاقستانعا الدىڭعى ساپارى 2001 -جىلدىڭ قىركۇيەگىندە، نيۋ- يورك قالاسىندا 11-قىركۇيەك كۇنى بولعان قايعىلى تەراكتىدەن بىرنەشە كۇن وتكەن سوڭ بولعان ەدى.
«الەمدىك جانە ءداستۇرلى دىندەر ليدەرلەرىنىڭ سەزىن قازاقستاندا وتكىزۋ يدەياسى پاپانىڭ ساپارى كەزىندە تۋىندادى. ەكى جىلدان كەيىن، 2003 -جىلى 23-24-قىركۇيەكتە استانادا الەمدىك جانە ءداستۇرلى دىندەر ليدەرلەرىنىڭ I سەزى ءوتتى. العاشقى كۇندەردەن باستاپ ۆاتيكان دا سەزدىڭ جوعارى دەڭگەيدەگى تۇراقتى جانە بەلسەندى قاتىسۋشىسى بولدى.
وسىلايشا، ريم پاپاسى فرانسيسك الەمدىك جانە ءداستۇرلى دىندەر ليدەرلەرىنىڭ سەزىنە قاتىسۋىن راستاعان ريم- كاتوليك شىركەۋىنىڭ ءبىرىنشى باسشىسى بولدى»، - دەدى سەز ۇيىمداستىرۋشىلارى.