«زاڭ جوباسى قازاقستاننىڭ اكىمشىلىك- اۋماقتىق قۇرىلىسى سالاسىنداعى زاڭنامانى جەتىلدىرۋگە باعىتتالعان. ەلدىڭ اكىمشىلىك- اۋماقتىق بىرلىكتەرىنىڭ ساناتتارى، جەكەلەگەن ەلدىمەكەندەردىڭ اتاپ ايتقاندا اۋداندىق ماڭىزى بار قالالاردىڭ قازىرگى مارتەبەسىن تولىق كولەمدە كورسەتپەيدى. بۇگىنگى تاڭدا 48 اۋداندىق ماڭىزى بار قالانىڭ 13- ءى حالىق سانى بويىنشا قالا مارتەبەسىنە سايكەس كەلمەيدى، سەبەبى قولدانىستاعى اكىمشىلىك- اۋماقتىق قۇرىلىس تۋرالى زاڭعا سايكەس اۋداندىق ماڭىزى بار قالالارعا حالقىنىڭ سانى 10 مىڭ ادامنان كەم ەمەس ەلدىمەكەندەر جاتادى»، - دەدى ءماجىلىس دەپۋتاتى ءاليا ساپاروۆا پارلامەنت ماجىلىسىندە «ق ر كەيبىر زاڭنامالىق اكتىلەرىنە وڭىرلەردىڭ اكىمشىلىك- اۋماقتىق قۇرىلىسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن وقي وتىرىپ.
دەپۋتاتتىڭ ايتۋىنشا، اۋداندىق ماڭىزى بار قالالارداعى تۇرعىندار سانىنىڭ ازايۋىنا بايلانىستى ولاردىڭ مارتەبەسىن وزگەرتۋ قاجەتتىگى تۋىندايدى.
«بۇل رەتتە زاڭنامادا اۋداندىق مارتەبەسى قالانىڭ مارتەبەسىن اۋىلعا وزگەرتۋ جونىندەگى قۇقىقتىق تەتىك كوزدەلمەگەن. وسىعان بايلانىستى دەپۋتاتتار وسى زاڭعا اۋداندىق ماڭىزى بار قالالاردى وزگە ەلدىمەكەندەرگە قايتا قۇرۋ جونىندەگى قۇزىرەتتى ايقىنداۋعا باعىتتالعان تۇزەتۋلەردى ەنگىزدى. قالا مارتەبەسىنىڭ اۋىلعا وزگەرۋى - جەرگىلىكتى تۇرعىندارعا اۋىلدى ەلدىمەكەندەردىڭ تۇرعىندارى ءۇشىن قاراستىرىلعان مەملەكەتتىڭ قولداۋدىڭ بارلىق شارالارىن الۋعا مۇمكىندىك بەرەتىنىن اتاپ وتكەن ءجون»، - دەدى ول.
اۆتور: ايان بەكەن ۇلى