قىزىلوردا وبلىسىنداعى تىكۇشاق اپاتى: بورتتا بولعان 13 ادامنىڭ ءبارى قازا تاپتى
«جاۋىنگەرلىك مىندەتىن اتقارۋ بارىسىندا ق ر قارۋلى كۇشتەرىنىڭ تىكۇشاعىنىڭ اپاتقا ۇشىراۋى سالدارىنان وقۋ- جاتتىعۋ كەزىندە بورتتا بولعان 13 اسكەري قىزمەتشى قازا تاپتى. قازاقستان رەسپۋبليكاسىنىڭ بۇكىل قارۋلى كۇشتەرى قازا تاپقانداردىڭ تۋعان- تۋىستارىنا قايعىرا كوڭىل ايتادى. قورعانىس مينيسترلىگىنىڭ باسشىلىعى مورالدىق جانە ماتەريالدىق كومەك كورسەتۋ بويىنشا بارلىق شارالاردى قولعا الادى»، - دەلىنگەن مينيسترلىكتىڭ سايتىندا.
ەسكە سالا كەتسەك، ق ر ءى ءى م ت ج ك باسپا ءسوز قىزمەتى بۇعان دەيىن قىزىلوردا وبلىسىنىڭ جالاعاش اۋدانىندا مي-8 تىكۇشاعى اپاتقا ۇشىراعانىن حابارلاعان بولاتىن.
قورعانىس مينيسترلىگىنىڭ حابارلاۋىنشا، اتالمىش تىكۇشاق 4 بىردەي اسكەري تىكۇشاق قۇرامىنان تۇراتىن بولىممەن بىرگە اقتاۋ قالاسىنان شىمكەنتكە ۇشىپ بارا جاتقان. ۇشۋ ساپارى ارنايى بولىمشەلەردىڭ «التىن جەبە» كەشەندى وقۋ جانە جاتتىعۋ اياسىندا قاراڭعىدا ءارى كۇردەلى مەتەورولوگيالىق جاعدايدا جۇرگىزىلگەن.
«قورعانىس ءمينيسترى نۇرلان ەرمەكبايەۆتىڭ بۇيرىعىمەن اپات ورنىنا ارنايى قۇرىلعان ق ر قورعانىس مينيسترلىگىنىڭ كوميسسياسى جىبەرىلدى. قازىرگى ۋاقىتتا ءتورت تىكۇشاقتىڭ ەكەۋى قىزىلوردا قالاسىنا قوندى. ال قالعان ءبىر تىكۇشاق وقيعا ورنىنا قايتا ورالدى. قورعانىس مينيسترلىگى ىشكى ىستەر مينيسترلىگىمەن بىرلەسىپ، بولعان اۋە اپاتىنىڭ سەبەبىن انىقتاۋ ماقساتىندا تەرگەۋ جۇمىستارىن جۇرگىزىپ جاتىر»، - دەلىنگەن مينيسترلىكتىڭ حابارلاماسىندا.
اۆتور: ايان بەكەن ۇلى