قىزىلوردا وبلىسىندا قۇلاعان تىكۇشاقتىڭ ىشىندە 13 ادام بولعان
«بورتتا 13 ادام بولعان. الدىن الا مالىمەت بويىنشا، وقيعا ورنىندا كوز جۇمعاندار بار. زارداپ شەككەندەردىڭ جاعدايى انىقتالۋدا»، - دەلىنگەن مينيسترلىكتىڭ حابارلاماسىندا.
ەسكە سالا كەتسەك، ق ر ءى ءى م ت ج ك باسپا ءسوز قىزمەتى بۇعان دەيىن قىزىلوردا وبلىسىنىڭ جالاعاش اۋدانىندا مي-8 تىكۇشاعى اپاتقا ۇشىراعانىن حابارلاعان بولاتىن.
قورعانىس مينيسترلىگىنىڭ حابارلاۋىنشا، اتالمىش تىكۇشاق 4 بىردەي اسكەري تىكۇشاق قۇرامىنان تۇراتىن بولىممەن بىرگە اقتاۋ قالاسىنان شىمكەنتكە ۇشىپ بارا جاتقان. ۇشۋ ساپارى ارنايى بولىمشەلەردىڭ «التىن جەبە» كەشەندى وقۋ جانە جاتتىعۋ اياسىندا قاراڭعى ۋاقىتتا ءارى كۇردەلى مەتەورولوگيالىق جاعدايدا جۇرگىزىلگەن.
قورعانىس ءمينيسترى نۇرلان ەرمەكبايەۆتىڭ بۇيرىعىمەن اپات ورنىنا ارنايى قۇرىلعان ق ر قورعانىس مينيسترلىگىنىڭ كوميسسيا جىبەرىلدى. قازىرگى ۋاقىتتا ءتورت تىكۇشاقتىڭ ەكەۋى قىزىلوردا قالاسىنا قوندى. ال قالعان ءبىر تىكۇشاق وقيعا ورنىنا قايتا ورالدى. قورعانىس مينيسترلىگى ىشكى ىستەر مينيسترلىگىمەن بىرلەسىپ، بولعان اۋە اپاتىنىڭ سەبەبىن انىقتاۋ ماقساتىندا تەرگەۋ جۇمىستارىن جۇرگىزىپ جاتىر.
اۆتور: ايان بەكەن ۇلى