«اناسى رەتىندە ايتارىم، بۇل اقپارات مۇلدەم شىندىققا جاناسپايدى. ءوزىم پەداگوگپىن. قازمۋ- دىڭ فيلولوگيا فاكۋلتەتىن بىتىرگەنمىن. مەن بالاما مۇنداي تاربيە ەش ۋاقىتتا بەرمەس ەدىم. جامبىل - بۇل ءبۇتىن قازاق كوزىن تىگىپ وتىرعان بالا. ءبىزدىڭ ەسكىنى جاڭعىرتۋ ويىمىزدا جوق. ءار نارسە ءوز ۋاقىتىمەن»، - دەيدى جامبىلدىڭ اناسى كامشات يبرايىموۆا.
بالا اقىننىڭ اناسى جامبىلدىڭ ەرتەڭ وتەتىن شىعارماشىلىق كەشىندە «ءمولدىر مونشاق» دەگەن ءاننىڭ ورىندالاتىندىعىن اتاپ ءوتتى. «شىعارماشىلىق كەشىندە «ءمولدىر مونشاق» دەگەن ءانىنىڭ ورىندالاتىندىعى راس. بۇل ءبىرىنشى شىعارعان تۋىندىسى، تۇساۋى كەسىلەدى. قازىر ونىڭ كومپوزيتورلىقپەن دە اۋەستەنىپ جۇرگەنى شىندىق. اڭگىمە وسى اننەن شىققان سياقتى. ءبىراق، ول ەشكىمگە ارنالماعان.
جامبىلدىڭ ەكى كىتابى جارىق كوردى. ەندى مىنە، ءۇشىنشى كىتابى دايىن تۇر. مادەنيەت جانە سپورت مينيسترلىگىنىڭ قولداۋىمەن جاقىن ارادا «ولەڭىم - ءومىرىم» دەگەن اتپەن شىعادى. تۇڭعىش كىتابى «تاڭىردەن كەلگەن ءتاتتى سىي» دەگەن اتاۋمەن اۋديو تۇرىندە شىعىپ، بالاباقشالارعا تاراتىلدى. ەكىنشى كىتابى ەلباسى قورىنىڭ قولداۋىمەن «پەرىشتە تىلەك» دەگەن اتپەن جاريالاندى»، - دەدى كامشات يبرايىموۆا.
ايتا كەتەيىك، بالا اقىن جامبىل دۇيسەنوۆتىڭ 13 جاسىندا شاڭىراق كوتەرەتىندىگى جايىندا اقپارات الدىمەن Instagram-دا جاريالانىپ، ارتىنان ونى ءبىرقاتار اقپارات اگەنتتىكتەرى جاريالاعان بولاتىن. وندا: «اتا- بابا ءداستۇرى بويىنشا 13 جاستا وتاۋ يەسى بولۋ ماقساتىندا حالقىمىزدىڭ سالت ءداستۇرى مەن ادەت- عۇرىپپەن بولاشاق كەلىنگە سىرعا سالدى. 30 - قاراشادا وتەتىن كەشىندە جامبىلدىڭ كەلىن بالاعا ارنالعان «ءمولدىر مونشاق» ءانى ورىندالادى»، - دەلىنگەن ەدى.
اۆتور: مارلان جيەمباي