قازاقستان مەن وزبەكستان 13 جىلعا سوزىلعان شەكارانى بەلگىلەۋ جۇمىسىن اياقتاۋدا
ەكى تاراپ تا قورىتىندى قۇجاتتى اياقتاپ جاتىر. بۇل تۋرالى قازاقپارات تىلشىسىنە ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ ءمالىم ەتتى.
«بۇل جۇمىس ۇزاق ۋاقىتتان بەرى كەلە جاتقان ماسەلە. ەكى تاراپ مەملەكەتتىك شەكارانى ورناتۋعا ەندى- ەندى جاقىندادى. سوڭعى قورىتىندى قۇجاتتار ازىرلەنۋدە. ەكى ەلدىڭ ساراپشىلارى دا جۇمىس ىستەدى. مەملەكەتتىك شەكارانى ورناتۋ جۇمىسى اياقتالعان سوڭ، تولىق اقپاراتتى حابارلايمىز»، - دەدى ءا. جايناقوۆ.
ءا. جايناقوۆ ءمالىم ەتكەندەي، جىل باسىنان بەرى شەكارا ورناتۋ جونىندەگى قازاقستان- وزبەكستان كوميسسياسىنىڭ بىرلەسكەن ءۇش وتىرىسى وتكەن، سونداي- اق، ەكى جۇمىس توبى دا كەزدەسىپ، ماسەلەنى پىسىقتاعان.
ق ر سىرتقى ىستەر مينيسترلىگىنىڭ مالىمەتىنە سەنسەك، جەرگىلىكتى ەلدى مەكەندەردەگى شەكارا بەلگىسى 1565 نەگىزگى جانە ارالىق شەكارا باعانىمەن بەلگىلەنگەن. وسى 1565 باعاننىڭ 776-سىن قازاقستان تاراپى قويىپ شىققان.
اۆتور: كەنجەكەي توقتامۇرات قىزى