وقۋشى بالا ينتەرنەتتەگى پوستىلاردىڭ ءبىرىنىڭ استىنا ءوزىنىڭ ويىن اشىق بىلدىرگەن پىكىرىن جازادى.
ونىسى پرەزيدەنت رەدجەپ تايپ ەردوعاننىڭ قازىرگى ۇستانىپ وتىرعان ىشكى جانە سىرتقى ساياساتىن سىناۋ بولىپ شىققان. بۇدان مەملەكەت باسشىسىنىڭ ار-نامىسىن قورلاۋ فاكتىسىن تاپقان پوليتسيا قىزمەتكەرلەرىنە ونى جازعان اۆتوردى تابۋ ونشالىقتى قيىنعا تۇسكەن جوق.
Todayszaman اقپارات باسىلىمىنىڭ مالىمەتىنشە، كۇشتىك قۇرىلىمدار جاسوسپىرىمنىڭ ۇيىنە ساۋ ەتىپ، باسىپ كىرەدى. سوسىن قاتتى قورقىپ كەتكەن وقۋشىنى ولار پوليتسيا ۋچاسكەسىنە جەتكىزەدى. وسىندا بەس ساعاتتان استام ۋاقىت تەرگەۋدە بولعان بالاعا قىسىم جاساۋ ودان ءارى جالعاسقان. ەندى پروكۋراتۋرا وقۋشىنىڭ پسيحيكاسى دۇرىستىعىن تەكسەرگەن ءجون دەپ تابادى.
جالپى، بۇل تۇركيادا وقۋشىلارعا قاتىستى ورىن الىپ وتىرعان ءبىرىنشى وقيعا ەمەس. وتكەن جىلى جازدا تاعى ءبىر 13 جاسار بالا سىنىپتاستارىنىڭ ورتاسىندا رەدجەپ ەردوعاندى مازاققا اينالدىرىپ، قورلاعانى ءۇشىن قاماۋعا الىنعان بولاتىن. سوڭىنان ول دا جۇيكە اۋرۋلارى اۋرۋحاناسىنان ءبىر-اق شىققان.
تۇرىك ەلىنىڭ باسشىسى ءوزىنىڭ اتىنا ايتىلعان ۇساق-تۇيەك سىنداردىڭ ءوزىن نازاردان تىس قالدىرمايدى. مىسالى، وپپوزيتسيالىق حالىق-رەسپۋبليكالىق پارتياسىنىڭ ءتوراعاسى كەمال كىلىچداروگلۋ وتكەن جىلى ەردوعاندى «ديكتاتۋرانىڭ كاريكاتۋراسى» دەگەنى ءۇشىن سوتتىڭ شەشىمىمەن 100 مىڭ لير (33 مىڭ دوللار) اقشاعا ايىپقا تارتىلعان بولاتىن.