قىتايدا 130 ميلليون جىل بۇرىن تىرشىلىك ەتكەن دينوزاۆرلار قالدىعى تابىلدى
بۇل تۋرالى جەرگىلىكتى تابيعي رەسۋرستار اگەنتتىگى ۇيىمداستىرعان بريفينگتە ايتىلدى، دەپ حابارلايدى قازاقپارات شينحۋا اگەنتتىگىنە سىلتەمە جاساپ.
قالدىقتار چەندە قالاسى فەننين- مانجۋر اۆتونومدى ۋەزى اۋماعىنان الىندى. ولار ەكى قۇسجامباستى دينوزاۆر ينفراجاساعى - ستەگوزاۆر مەن ءمۇيىزدى دينوزاۆرعا جاتادى.
ۇزىندىعى 5 مەترلىك ستەگوزاۆر قالدىعى ءمىنسىز ساقتالعان. تاسقا اينالعان سۇيەك اينالاسىنان تەرى بولىكتەرى تابىلدى، ول قابىرشاق قۇرىلىمى بويىنشا قازىرگى جىلان نەمەسە كەسىرتكەلەردىڭ قابىعىنا ۇقسايدى.
«ءبىزدىڭ زامانىمىزعا دەيىن دينوزاۆر تەرىسىنىڭ ساقتالۋى - سيرەك كەزدەسەتىن، عىلىمي قۇندىلىعى جوعارى قۇبىلىس»، - دەپ جازادى ليني ۋنيۆەرسيتەتى گەولوگيا جانە پالەونتولوگيا ينستيتۋتىنىڭ قىزمەتكەرى گو ين.
ونىڭ پىكىرىنشە، ستەگوزاۆردىڭ تەرى بولىگى تابىلعان اۋماق - 3 شارشى مەتر. ولجا دينوزاۆر ءتۇرىنىڭ ەرەكشەلىگى، تەرىسىنىڭ فيزيولوگيالىق قىزمەتى، گەوگرافيالىق جاعداي مەن كليماتتىڭ وزگەرۋى سىندى باعىتتاردى تەرەڭ زەرتتەۋگە مۇمكىندىك بەرەدى.
ەكىنشىسى - عالىمداردىڭ پىكىرىنشە، سۇيەكتى دينوزاۆرلاردىڭ «كونە» وكىلى. ونىڭ باس سۇيەگىندە روسترالى سۇيەك ءسال عانا شىعىپ تۇر، ال ارتقى اياق-قولى الدىڭعىسىنان ايتارلىقتاي ۇزىن. ينستيتۋت پروفەسسورى جان فۋچەن مۇنداي ولجا قۇسجامباستى دينوزاۆرلاردىڭ وسى ءتۇرىن زەرتتەۋ سالاسىنداعى ءبىلىمدى تەرەڭدەتۋگە مۇمكىندىك بەرەتىنىن ايتادى.