«كەيبىرەۋلەر مەن ساپاردان وتە از اسەر الادى دەپ ايتاتىن شىعار، مەن ەشتەڭە كورە المايمىن، ءبىراق الەمدى تەك كوزبەن كورۋگە بولادى دەگەن ءسوز ەمەس» ، - دەيدى انگليادان كەلگەن ساياحاتشى.
Travel TV شوۋ توبى ونى ەفيوپياعا ساپارىندا كەزدەستىردى.
«مەن ادامداردىڭ قايلاي سويلەسەتىنىن ەستيمىن، مەن تاۋلارعا كوتەرىلىپ، تومەن تۇسەمىن، اينالامداعى بارلىق نارسەنى تەرىم ارقىلى، اياعىم ارقىلى سەزىنەمىن» ، - دەيدى ول.
دجايلز 41 جاستا. سوڭعى 20 جىلىن الەم بويىنشا ساياحاتتاۋمەن وتكىزدى.
وسى ساپارلاردىڭ بىرىندە ول ءوزىنىڭ قۇربىسىمەن كەزدەستى. قۇربىسى گرەتسيا تۇرعىنى، ونىڭ دا كوزى كورمەيدى.
بىلتىر ەكەۋى رەسەيگە بىرگە بارعان. ولار پويىزبەن بۇكىل ەل بويىنشا ساياحاتتادى. ءبىراق كوپتەگەن ساپارلاردا دجايلز جالعىز جولعا شىعادى.
ءتونيدىڭ ءجاسوسپىرىم كەزىندە قايتىس بولعان اكەسى ءۇشىن زەينەتاقى بەرىلەدى. ول سول اقشاعا قىدىرادى. مارشرۋتىن الدىن- الا جانە وتە مۇقيات جوسپارلايدى. اناسى وعان بيلەتتەردى برونداۋعا كومەكتەسەدى، ويتكەنى كوپتەگەن اۆياكومپانيالاردىڭ ۆەب- سايتتارى زاعيپ جاندارعا بيلەتتەردى ءوز بەتىمەن ساتىپ الۋعا مۇمكىندىك بەرەتىن تەحنولوگيالاردى پايدالانبايدى. توني عالامتور ارقىلى ساياحاتتاۋ كەزىندە وعان كومەكتەسەتىن ادامداردى ىزدەيدى.
«مەن جاي عانا نۇسقاۋلىق الىپ، شەشىم قابىلداي المايمىن. مەن قايدا بارا جاتقانىمدى الدىن- الا ءبىلۋىم كەرەك. مەنىڭ جادىم وتە جاقسى. مەن باعداردى ءوزىم جوسپارلايمىن» ، - دەيدى توني.
جاڭا ەلمەن، قالامەن نەمەسە ەلدىمەكەنمەن تانىسۋ توني ءۇشىن ەرەكشە اسەر بەرەدى.
تونيگە سوقىرلىققا الىپ كەلەتىن اۋرۋ دياگنوزى قويىلعاندا، ول توعىز ايلىق ەدى. ون جاسىندا ول سوقىر بولىپ قالدى.
التى جاسىندا وعان ءىشىنارا ەستۋ قابىلەتىنىڭ جوعالۋى دياگنوزى قويىلعان. قازىر توني ارنايى ەستۋ اپپاراتتارىن قولدانادى، ءبىراق ول ءالى دە بارلىق دىبىستاردى ەستىمەيدى.
توني ءوزىن سوقىر سەزىنگەندىكتەن ۇزاق ۋاقىت بويى دەپرەسسياعا ۇشىراعانىن ايتادى.
ول سوقىر بالالارعا ارنالعان ارنايى مەكتەپتە وقىدى، سودان كەيىن العاش رەت باسقا ەلگە ساپار شەكتى.16 جاسىندا ول سىنىپتاستارىمەن بىرگە بوستونعا باردى.
الايدا قازىردىڭ وزىندە دەنساۋلىققا بايلانىستى ماسەلەلەر كەيدە ىنتا- جىگەردەن باسىم بولادى. ماسەلەن، 2008 -جىلى ءتونيدىڭ بۇيرەگى ىستەن شىقتى، ترانسپلانتاتسيا جاساۋ قاجەت بولدى. ونىڭ وگەي اكەسى دونور بولدى. توني الكوگولدىڭ كومەگىمەن وسى كۇيزەلىستەردەن امان قالۋعا تىرىستى.
«مەن كەلەسى التى- جەتى جىل ىشىمدىك ءىشىپ كەتتىم. 24 جاسىمدا ماسكۇنەم بولدىم» ، - دەپ ەسكە الادى ول.
«مەن ىشىمدىكتى قويعان سوڭ جاعىمسىز ەموتسيالارمەن كۇرەسۋدىڭ باسقا ءادىسى بار ەكەنىن ءتۇسىندىم» ، - دەيدى توني.
2000 -جىلى ناۋرىزدا ول نيۋ- ورلەانعا ساپارعا اتتاندى. جاڭا ەلدەرمەن تانىسۋ وعان قاجەتتى جاعىمدى ەموتسيالار بەرەدى.
«مەن جاڭا ادامدارمەن كەزدەسكەن كەزدە، ولار مەنىمەن بىرگە ەكەنىنە سەنىمدىمىن، ءبىراق مەن ولاردى تۇلعا رەتىندە قانداي ەكەنىن بىلمەيمىن» ، - دەيدى ساياحاتشى.
«مەنىڭ ەڭ ۇلكەن قىزىعۋشىلىعىم - مۋزىكا. مەن ىرعاقتى سەزىنەمىن. مۋزىكا بارلىق كەدەرگىلەردى جويادى» ، - دەيدى توني.
ول سونىمەن قاتار ءارتۇرلى جەرگىلىكتى تاعامداردى جەۋدى ۇناتادى. بۇل ونىڭ ساياحات باعدارلاماسىنىڭ تۇراقتى تارماقتارىنىڭ ءبىرى.
توني جەردىڭ كوپتەگەن ادەمى بۇرىشتارىن ارالادى. ساياحات كەزىندە ول ءجيى سۋرەتكە تۇسەدى.
ول ەشقاشان ءوزىنىڭ جەكە سۋرەتتەرىن كورمەۋى مۇمكىن، ءبىراق ونىڭ سۋرەتتەرىن سايتقا كىرۋشىلەر كورەدى.
كەيدە ول ءوزىنىڭ ساياحاتقا دەگەن سۇيىسپەنشىلىگىن تۇسىنە المايتىن ادامدارمەن كەزدەسەدى.
«نەگە زاعيپ ادام الەمدى ارالاعىسى كەلەدى؟ » - دەپ سۇرايدى ولار. توني وندايلارعا «ال، نەگە ساياحاتتاماسقا؟ » دەپ قاراپايىم تۇردە جاۋاپ بەرەدى.