پاريجدىڭ كليمات جونىندەگى كەلىسىمىنە 130 مەملەكەت قول قويۋعا دايىن ەكەنىن حابارلادى
15:52, 09 - ءساۋىر 2016
استانا. قازاقپارات - 22- ءساۋىر كۇنى ب ۇ ۇ- نىڭ نيۋ-يوركتەگى شتاب-پاتەرىندە بىلتىرعى جىلدىڭ جەلتوقسان ايىندا پاريجدە قابىلدانعان كليمات بويىنشا تاريحي كەلىسىمگە قول قويۋدىڭ «جوعارى دەڭگەيدەگى ءراسىمى» وتەدى.
وعان الەمنىڭ 130 ەلى قاتىسۋعا دايىن ەكەنىن حابارلادى.
130 مەملەكەتتىڭ وكىلدەرى قۇجاتقا قول قويۋ ءۇشىن ۇيىمداستىرىلعان شارانىڭ العاشقى كۇنىندە قول قويادى. ولاردىڭ اراسىندا 60 مەملەكەتتىڭ نەمەسە ۇكىمەتتىڭ باسشىلارى بار.
كليمات جونىندەگى كەلىسىم 2015-جىلدىڭ جەلتوقسان ايىندا ب ۇ ۇ- نىڭ كليماتتى وزگەرتۋ ماسەلەلەرى بويىنشا شەڭبەرلىك كونۆەنتسياسىنا قاتىسۋشى ەلدەردىڭ 21-كونفەرەنتسياسىندا قابىلداندى. ول تومەن كومىرتەكتى جانە ەكولوگيالىق تۇراقتى بولاشاققا باستاۋى ءتيىس. قۇجاتتا جاھاندىق تەمپەراتۋرانىڭ كوتەرىلۋىن سەلسي بويىنشا 1,5 گرادۋس دەڭگەيىندە ۇستاپ تۇرۋ كوزدەلەدى.
ءپاريجدىڭ كليمات جونىندەگى كەلىسىمى ونى كەم دەگەندە 55 ەل بەكىتكەننەن كەيىن وتىز كۇن ىشىندە كۇشىنە ەنەدى.