بۇل ستاتيستيكانى ەلوردالىق دارىگەرلەر مالىمدەدى: شىلدە ايىنىڭ ون ءۇش كۇنىندە 11 بالا كوپ قاباتتى ءۇيدىڭ تەرەزەسىنەن قۇلاعان. زارداپ شەككەندەر - 1-4 جاس ارالىعىنداعى بۇلدىرشىندەر.
«بالالار ءتۇرلى سۇيەك جاراقاتى، باس سۇيەگى مەن ىشكى ورگاندارى زاقىمدانعان وتە اۋىر جاعدايدا جەتكىزىلدى»، - دەدى مەديا ورتالىقتىڭ تىلشىسىنە بەرگەن سۇحباتىندا №2 -قالالىق بالالار اۋرۋحاناسىنىڭ تراۆماتولوگيا ءبولىمىنىڭ مەڭگەرۋشىسى بايماحان سادۋوۆ.
ايتا كەتەرلىگى، تەرەزەدەن قۇلاعان بالالاردىڭ بارلىعى ۇيلەرىندە ۇلكەندەرمەن بىرگە بولعان. «ءتىپتى، بالالار ۇيلەرىندە ۇلكەندەرمەن بىرگە بولعان كەزدە قۇلاپ كەتىپ، ال اتا-انالارى بۇل تۋرالى بىلمەگەن جاعدايلار كەزدەستى. ۇيدەگى بالانىڭ قۇلاعانىن كورشىلەرىنەن ەستىگەن»، - دەدى ول.
مىسالى، 2 -شىلدەدە استاناعا تۋىستارىنىڭ ۇيىنە قوناققا كەلگەن ءتورت جاستاعى بالا 8- قاباتتان قۇلاپ، ابىروي بولعاندا امان قالدى. بالانى كورشىلەرى كورىپ، جەدەل جاردەم شاقىرعان. تۋىستارى بولسا بىرەر مينۋت قاراۋسىز قالدىرعاندارىن ايتىپ اقتالدى. وقيعا ورىن العان كەزدە بالانىڭ اناسى پاۆلودار وبلىسىندا بولعان.
«تەرەزەدە موسكيتتىك تور بار بولسا دا، بالكون اشىق تۇرعان كەزدە بالالاردى باقىلاۋسىز قالدىرماۋ كەرەك. مۇنداي سۇمدىقتى باسىمنان وتكەردىم، ءتىپتى دۇشپانىمنىڭ باسىنا بەرمەسىن»، - دەيدى بالانىڭ اناسى.
وسى ورايدا دارىگەرلەر بالالاردىڭ تەرەزەدەن قۇلاۋىنا جول بەرگەن ۇلكەندەر مەن اتا-انالارعا جازانى كۇشەيتۋ كەرەك دەپ ەسەپتەيدى. «قولدانىستاعى زاڭناماعا سايكەس، مۇنداي جاعدايدا ۇلكەندەر جاۋاپكەرشىلىككە تارتىلمايدى. الايدا بالالارعا دۇرىس قاراماعان اتا-انالاردىڭ جاۋاپكەرشىلىگىن زاڭ جۇزىندە قولدانىسقا ەنگىزسە دەگەن تىلەگىمىز بار. سول كەزدە بالاعا باس-كوز بولىپ، سالعىرت قارامايتىن بولادى. بالانىڭ قۇلاعانى دۇرىس ەمەس»، - دەدى ءوز سوزىندە ب. سادۋوۆ.
رەسمي دەرەككە سايكەس، 2015 -جىلدىڭ التى ايىندا استانادا كوپ قاباتتى ءۇيدىڭ تەرەزەسىنەن 18 بالانىڭ قۇلاۋ فاكتىسى تىركەلسە، 2017 -جىلدىڭ قاڭتار- ماۋسىم ايلارىندا مۇنداي قىرىققا جۋىق وقيعا تىركەلدى. ونىڭ 29 جاعدايىندا بالالار تەرەزەدەن قۇلاعان.