تۇركيا پورتىنداعى جارىلىستان زارداپ شەككەندەر سانى 12 گە جەتتى

ىستانبۇل. قازاقپارات - تۇركيانىڭ دەريندجە پورتىنداعى جارىلىستان زارداپ شەككەندەر سانى 12 ادامعا جەتتى. جارىلىس كەمەلەرگە استىق تيەيتىن ايماقتا بولعان، دەپ حابارلايدى قازاقپارات euronews.com عا سىلتەمە جاساپ.

كۇشتى جارىلىس كەشە ىستانبۇلدان 100 شاقىرىم جەردە، ءمارمار تەڭىزى جاعالاۋىندا ورنالاسقان كودجاەلي پروۆينتسياسىنداعى ءىرى كوممەرتسيالىق پورت - دەريندجەدە بولعان. بۇعان دەيىن 10 ادامنىڭ زارداپ شەككەنى حابارلانعان ەدى.

جارىلىس ەليەۆاتورلاردان كەمەلەرگە استىق تيەيتىن ايماقتا بولعان. ەليەۆاتورلار تۇركيا استىق كەڭەسىنە تيەسىلى.

«ناقتى دەرەكتەر بويىنشا، جارىلىس سالدارىنان 12 ادام جارالاندى، ەكەۋىنىڭ جاعدايى اۋىر. جارىلىس 16 ەليەۆاتوردىڭ 13 ءىن بۇلدىرگەن»، - دەپ حابارلادى كودجاەلي قالاسىنىڭ ءمەرى تاحير بيۋيۋكاكىن.

جارىلىس سەبەپتەرى تەكسەرىلىپ جاتىر. پورتتىڭ كونتەينەرلىك ينفراقۇرىلىمى زاقىمدالعان جوق.