قىتايلىق سۋعا باتىپ بارا جاتقان ايەلدى قۇتقارۋ ءۇشىن 12 مەتر بيىكتەن سەكىردى - ۆيدەو
South China Morning Post ايەلدى سۋدان شىعارعان سوڭ ول جۇمىسىن قايتا جالعاستىرعان.
حاڭجوۋ قالاسىندا كۋرەر بولىپ جۇمىس ىستەيتىن 31 جاستاعى پىڭ كيڭلين اياق استىنان باتىر بولىپ شىعا كەلدى. ونىڭ ەرلىگى جايلى الەۋمەتتىك جەلى قولدانۋشىلارى تامسانا جازىپ جاتىر.
13-ماۋسىم كۇنى ول ەلەكتروۆەلوسيپەدپەن تاپسىرىسقا بارا جاتقان. جولدا چيانتاڭجياڭ وزەنىندە سۋعا باتىپ بارا جاتقان ايەلدى كورىپ قالىپ، وعان قول ۇشىن سوزۋ ءۇشىن 12 مەتر بيىكتىكتەگى كوپىردەن سەكىرگەن.
سۋعا سەكىرگەندە باستاپقىدا ءوزى قينالعانداي كورىنگەنىمەن، ەسىن بىردەن جيىپ، ايەلدى دە قۇتقارىپ قالدى.
بيىك ەدى، اياعىم دىرىلدەپ كەتتى. ەگەر سەكىرمەسەم، ول ءولىپ كەتۋى مۇمكىن ەدى. ادام ومىرىنەن ارتىق ەشتەڭە جوق. سول جايت ەسىمە تۇسسە، ءوزىم قورقىپ كەتەمىن. سەبەبى سول ساتتە نە بولىپ جاتقانىن تۇسىنگەن جوقپىن، - دەيدى ول.
كوپ ۇزاماي وقيعا ورنىنا قۇتقارۋشىلار مەن پوليتسيا جەتىپ، ەكەۋىن دە سۋدان شىعارىپ الدى.