پاريجدە 12 قاباتتان جوعارى ۇيلەر سالۋعا تىيىم سالىندى
پيراميدا فورماسىندا سالىنىپ جاتقان Tour Triangle مۇناراسىنىڭ قۇرىلىسى كوپشىلىك نارازىلىعىن تۋدىردى، دەپ حابارلايدى قازاقپارات euronews.com-گە سىلتەمەمەن.
ءيا، مۇندا ەيفەل مۇناراسى بار، ءبىراق، سوعان قاراماستان، پاريج شاعىن قاباتتى نىسانداردان تۇراتىن قالا بولىپ قالا بەرمەك.
ماۋسىم ايىندا فرانسيا استاناسىندا «جەرگىلىكتى ۋربانيزاتسيا جوسپارى» (PLU) قابىلداندى. بەلسەندىلەردىڭ ايتۋىنشا، بۇل جوسپار ەكولوگيانىڭ ساقتالۋىنا ىقپال ەتەتىن بولادى.
پاريج قالالىق كەڭەسى جاڭا عيماراتتاردى 12 قاباتتان (37 مەتر) اسىرماۋ تۋرالى شەكتەۋدى قولداپ، داۋىس بەرگەنننەن كەيىن PLU كۇشىنە ەندى.
پاريجدىڭ ىسكەرلىك اۋدانى دەفانستا بىرنەشە ءزاۋلىم عيماراتتار، ال 13 جانە 15- شاعىناۋدانداردا كلاسسيكالىق عيماراتتارعا قاراعاندا بيىكتەۋ ۇيلەر بار. ءبىراق، قالا ورتالىعىنداعى نىساندار بيىك ەمەس.
1973 -جىلى قۇرىلىسى اياقتالعان 209 مەترلىك مونپارناس مۇناراسىنا قاتىستى حالىق سىن ءبىلدىردى. كەيىن، 1977 -جىلى قالا اۋداندارىندا 37 مەتردەن جوعارى ۇيلەر سالۋعا تىيىم سالىندى. بۇل شەكتەۋ 2010 -جىلعا دەيىن قولدانىستا بولدى، سول جىلدان باستاپ قالانىڭ بۇرىنعى ءمەرى بەرتران دەلانوە پاريجدە 180 مەترلىك كەڭسەلەر جانە 50 مەترلىك تۇرعىن ۇيلەر سالۋعا رۇقسات ەتتى.
قازىر سالىنعان تىيىم مەر انن يدالگونىڭ اتموسفەراعا كومىرقىشقىل گازىن شىعارۋدى ازايتۋ باعدارلاماسى اياسىندا ەنگىزىلدى. بۇل شەشىمنىڭ تاعى ءبىر سەبەبى - داۋ تۋدىرعان پيراميدا ءتارىزدى سالىنىپ جاتقان Tour Triangle مۇناراسى. قۇرىلىس 2021 -جىلى باستالىپ، 2026 -جىلى اياقتالۋى ءتيىس ەدى. ءبىراق، ءتۇرلى زاڭدى تۇرعىداعى جانە جوسپارلاۋ بارىسىنداعى داۋلارعا بايلانىستى قۇرىلىس 12 جىلعا شەگەرىلدى. Tour Triangle قۇرىلىسى اياقتالسا، قالاداعى بيىكتىگى بويىنشا ءۇشىنشى عيمارات بولماق. وندا قوناقۇي مەن كەڭسەلەر، دۇكەندەر مەن ءدامحانالار بولادى.