«اقپاراتتىق كەڭىستىكتىڭ مونيتورينگىسىن اقپارات جانە قوعامدىق دامۋ مينيسترلىگى جۇزەگە اسىراتىنىنا جانە جاريالانىمداردا قىلمىستىق قۇقىق بۇزۋشىلىقتار قۇرامىنىڭ بەلگىلەرى انىقتالعان جاعدايدا ولاردى تەرگەۋلىگى بويىنشا ىشكى ىستەر مينيسترلىگىنە جىبەرەتىنىن اتاپ وتەمىز. وسى جىلعى 4 ايدا كورسەتىلگەن فاكتىلەر بويىنشا ىشكى ىستەر ورگاندارى ق ك- ءنىڭ 274-بابى بويىنشا 29 سوتقا دەيىنگى تەرگەپ-تەكسەرۋدى تىركەگەن. ونىڭ ىشىندە ءبىر ءىس سوتقا جىبەرىلدى، 8 ءى توقتاتىلدى (قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى)، 8 قىلمىستىق ءىس بويىنشا سوتقا دەيىنگى تەرگەپ-تەكسەرۋ مەرزىمدەرى ۇزىلگەن (قىلمىستىق قۇقىق بۇزۋشىلىق جاساعان ادامنىڭ انىقتالماۋىنا بايلانىستى)، 12 ءىس تەرگەپ، تەكسەرىلۋدە»، - دەدى باس پروكۋرور جاۋابىندا.
ونىڭ اتاپ وتۋىنشە، وسىنداي قۇقىق بۇزۋشىلىقتاردىڭ الدىن الۋ اياسىندا باس پروكۋراتۋرا «پروكۋراتۋرا تۋرالى» قازاقستان رەسپۋبليكاسىنىڭ كونستيتۋتسيالىق زاڭنىڭ 40-بابى تارتىبىمەن ب ا ق- تا بيىل ەكى رەت ۇندەۋ جاساپ، وندا ۇلتتىق الاۋىزدىقتى قوزدىرۋعا، سەپاراتيزمدى ناسيحاتتاۋعا جانە جالعان حابارلامالاردى تاراتۋعا باعىتتالعان قۇقىق بۇزۋشىلىقتار ءۇشىن زاڭدا بەلگىلەنگەن جاۋاپكەرشىلىك تۋرالى ەسكەرتكەن.
«مەملەكەت باسشىسى قازاقستان حالقىنا 2022-جىلعى 16- ناۋرىزداعى «جاڭا قازاقستان: جاڭارۋ جانە جاڭعىرتۋ جولى» اتتى جولداۋىندا مەملەكەتتىڭ مۇددەسىن، قوعامنىڭ سۇرانىسىن جانە مەديا سالانىڭ دامۋ ءۇردىسىن ەسكەرە وتىرىپ، وسى سالاداعى زاڭنامانى قايتا قاراۋ قاجەتتىلىگىن اتاپ ءوتتى»، - دەدى بەرىك اسىلوۆ.