قازاقستاندا 12 تاۋاردىڭ وزىندىك قۇنىن تومەندەتۋ ءۇشىن استىق باعاسى ارزانداتىلادى
«مەملەكەت باسشىنىڭ باعانى تۇراقتاندىرۋ تاپسىرمالارىنا ساي مينيسترلىكتىڭ قىزمەتى ازىق- تۇلىك ونىمدەرىن ءوندىرۋ مەن ءبولۋدىڭ بىركەلكى جۇيەسىنە، ساۋدا ينفراقۇرىلىمىنىڭ جۇمىسىنا نەگىزدەلۋدە. ءبىرىنشى - «فورۆاردتىق ساتىپ الۋدى»، تۇراقتاندىرۋ قورلارىن پايدالانۋ، «اينالىم سحەماسى» مەحانيزىمىن قايتا فورماتتاۋ ارقىلى نارىقتى وتاندىق تاۋارلارىمەن تولىقتىرۋ. ەكىنشى - ساۋدا ينفراقۇرىلىمىن دامىتۋ. ءۇشىنشى - تەحنيكالىق جانە ەكونوميكالىق تۇرعىدان ىشكى نارىقتى قورعاۋ. ءتورتىنشى - ساۋدا جەلىلەرىنە قولجەتىمدىلىكتى قامتاماسىز ەتۋ جانە ءتيىمسىز دەلدالداردى انىقتاۋ ارقىلى وندىرىلگەن ءونىمدى وتكىزۋگە جاعداي جاساۋ»، - دەدى ءبىرىنشى ۆيتسە-مينيستر.
ونىڭ ايتۋىنشا، ءوندىرىس كولەمىن ۇلعايتۋ ماقساتىندا «اينالىم سحەماسىنىڭ» جاڭا تاسىلدەرى اياسىندا قانت زاۋىتتارى قارجىلاندىرىپ، ىشكى نارىقتىڭ قاجەتتىلىگى قامتاماسىز ەتىلەدى. تۇراقتاندىرۋ قورلارى قىزمەتىنىڭ فورماتى وزگەرتىلدى. بۇل رەتتە باستى نازار ماۋسىمارالىق كەزەڭدە نارىقتىق باعالاردىڭ ماۋسىمدىق اۋىتقۋىن رەتتەۋ بولادى.
«ءبىز ءوز كوكونىستەرىمىزبەن نارىقتى ءساۋىر ايىنا دەيىن، ءارى قاراي شەتەلدەن ەرتە پىسەتىن كوكونىستەرمەن قامتاماسىز ەتەمىز. 12 تاۋاردىڭ وزىندىك قۇنىن تومەندەتۋ ءۇشىن ازىق-تۇلىك كورپوراتسياسى ارقىلى استىق باعاسى ارزانداتىلادى»، - دەدى ارمان شاققاليەۆ.