پرەزيدەنت سايلاۋى: 12 ۇمىتكەردىڭ نەشەۋى و س ك تالابىنا ساي
كەشە ق ر پرەزيدەنتتىگىنە كانديدات ۇسىنۋعا بەرىلگەن ۋاقىت تۇگەسىلگەن بولاتىن. ۇمىتكەر اتانىپ ۇلگەرگەن ادامنىڭ سانى - 12. ونىڭ ۇشەۋى ايەل. تاۋەلسىز قازاقستان تاريحىندا تۇڭعىش رەت ءۇش بىردەي ايەل كانديدات پرەزيدەنت سايلاۋىنا قاتىسۋعا نيەت ءبىلدىرىپ وتىر، دەپ حابارلايدى قازاقپارات ءتىلشىسى.
ورتالىق سايلاۋ كوميسسياسى ۇمىتكەرلەردىڭ تالاپقا سايكەستىگىن انىقتاۋ وتىرىستارىن وتكەن اپتانىڭ دەمالىس كۇندەرى باستاپ كەتكەن بولاتىن.
اۋەلى قازىرگى پرەزيدەنت قاسىم- جومارت توقايەۆتىڭ كانيدات رەتىندە تالاپتارعا سايكەستىگى تۋرالى قاۋلى قابىلداندى. ورتالىق سايلاۋ كوميسسياسى زاڭ اياسىندا قۇزىرەتتى ورگاندارعا سۇراۋ سالۋ ارقىلى قاسىم- جومارت كەمەل ۇلى توقايەۆتىڭ تۋمىسىنان قازاقستان رەسپۋبليكاسىنىڭ ازاماتى ەكەنىن بەلگىلەپ، كەيىنگى 69 جىل بويى قازاقستاندا تۇرعان دەگەن مالىمەتتى تىركەدى. ال مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى - 43 جىل 1 اي. وزگە كانديداتتاردان ءبىر ايىرماشىلىعى، قازاقستان رەسپۋبليكاسىنداعى سايلاۋ تۋرالى ق ر كونستيتۋتسيالىق زاڭىنىڭ 54-بابى 2-تارماعى بويىنشا، قازىرگى مەملەكەت باسشىسى رەتىندە مەملەكەتتىك تىلدەن ەمتيحان تاپسىرۋدان بوساتىلعان.
اۋەلى ق. توقايەۆتىڭ كانديداتۋراسىن پرەزيدەنتتىككە ءماسليحاتتار دەپۋتاتتارىنان قۇرالعان رەسپۋبليكالىق قوعامدىق بىرلەستىگى، «قازاقستان سپورتشىلار وداعى» رەسپۋبليكالىق قوعامدىق بىرلەستىگى، قازاقستاننىڭ ازاماتتىق اليانسى، «ارداگەرلەر ۇيىمى» رەسپۋبليكالىق قوعامدىق بىرلەستىگى، «Qazaqstan Team» قوعامدىق بىرلەستىگى، ۇلتتىق ۆولونتەرلىك جەلىسى ۇسىنعان بولاتىن. كەيىن بۇل قاتارعا AMANAT پارتياسى، «قازاقستان حالىق پارتياسى» جانە «اق جول» پارتياسى قوسىلىپ، ءبىر كواليتسياعا بىرىكتى.
ورتالىق سايلاۋ كوميسسياسىنىڭ تالاپقا سايكەستىگى تۋرالى قاۋلىسى ەكىنشى بولىپ مەيرام قاجىكەنگە بۇيىردى. ونىڭ كانيديداتۋراسىن « امانات « قازاقستان كاسىپوداقتار دوستاستىعى» رەسپۋبليكالىق كاسىپوداقتار بىرلەستىگى ۇسىنىپ وتىر. ىشكى ىستەر مينيسترلىگىنىڭ مالىمەتى بويىنشا، قاجىكەن مەيرام زەكەش ۇلى تۋمىسىنان قازاقستان رەسپۋبليكاسىنىڭ ازاماتى بولىپ تابىلادى، قازاقستاندا سوڭعى 61 جىل بويى تۇرادى. مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى - 14 جىل.
ەرەكشە ەسىمى ساياسي پارتيالار اراسىنداعى داۋعا ارقاۋ بولا جازداعان جيگۋلي دايرابايەۆتىڭ دا تالاپقا سايكەستىگى تۋرالى قاۋلى قابىلداندى. ىشكى ىستەر مينيسترلىگىنىڭ مالىمەتىنە سۇيەنسەك، «اۋىل» حالىقتىق- دەموكراتيالىق پاتريوتتىق پارتياسى ۇسىنعان ۇمىتكەر جيگۋلي مولداقالىق ۇلى دايرابايەۆ تۋمىسىنان قازاقستان رەسپۋبليكاسىنىڭ ازامات، قازاقستاندا سوڭعى 67 جىل بويى تۇرادى. مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى - 7 جىل.
جالپىۇلتتىق سوتسيال- دەموكراتيالىق پارتيا اتىنان ۇسىنىلعان ۇمىتكەر نۇرلان اۋەسبايەۆتىڭ دا ورتالىق سايلاۋ كوميسسياسى ق ر پرەزيدەنتتىگىنە كانديداتقا قويىلاتىن تالاپتارعا ساي ەكەنى تۋرالى قاۋلى قابىلدادى. ىشكى ىستەر مينيسترلىگىنىڭ دەرەگى بويىنشا، ول تۋمىسىنان قازاقستان رەسپۋبليكاسىنىڭ ازاماتى، ەلىمىزدە سوڭعى 65 جىل بويى تۇرادى. مەملەكەتتىك قىزمەتتەگى جۇمىس تاجىريبەسى - 10 جىل 8 اي.
ال، كەشە قاراقات ابدەن دە ورتالىق سايلاۋ كوميسسياسىنىڭ تالاپتارعا سايكەستىگى تۋرالى قاۋلىسىنا يە بولدى. قر ىشكى ىستەر مينيسترلىگى ۇسىنعان مالىمەت بويىنشا، ول تۋمىسىنان قازاقستاننىڭ ازاماتشاسى بولىپ سانالادى، قازاقستاندا سوڭعى 48 جىل تۇرادى. مەملەكەتتىك قىزمەتتەگى ەڭبەك ءوتىلى - 9 جىل 1 اي. بۇل بەستىك ورتالىق سايلاۋ كوميسسياسىنىڭ تالاپتارىنا سايكەستىگى قاۋلىمەن بەكىتىلگەن.
ال، «مۇقالماس» رەسپۋبليكالىق قوعامدىق بىرلەستىگىنىڭ اتىنان ۇسىنىلدى دەلىنگەن كانديدات، ءماجىلىستىڭ ەكس-دەپۋتاتى نۇرجان التايەۆتىڭ قۇجاتتارىنا قاتىستى داۋلى ماسەلە تۋىنداعان بولاتىن. ورتالىق سايلاۋ كوميسسياسى 7-قازاندا سول داۋلى ماسەلە بويىنشا تەكسەرىس باستالعانىن مالىمدەسە، 11-قازاندا نۇرجان التايەۆتىڭ ءتىل ەمتيحانىنان سۇرىنبەي وتكەنىن تىركەدى.
10-قازان كۇنى «حالىق دەموگرافياسى» قوعامدىق بىرلەستىگىنەن جۇماتاي الييەۆتىڭ قۇجاتى وتكىزىلگەنىمەن، ورتالىق سايلاۋ كوميسسياسى ءالى ونىڭ تالاپتارعا سايكەستىگى تۋرالى ناقتى ءبىر شەشىم قابىلداعان جوق.
«قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگىنىڭ اتىنان ۇسىنىلعان تالعات ەرعاليەۆتىڭ قۇجاتتارى دا و س ك قاراۋىندا جاتىر.
ۇمىتكەرلەردەن قۇجات قابىلداۋدىڭ سوڭعى كۇنىندە بىرنەشە ادام ورتالىق سايلاۋ كوميسسياسىنا جۇگىندى.
سولاردىڭ ءبىرى - «ورالمانداردىڭ «اسار» بىرلەستىگى» دەيتىن رەسپۋبليكالىق قوعامدىق بىرلەستىگى ۇسىنعان حايروللا ماعاۋيا ۇلى عابجاليلوۆ.
كانديداتۋراسىن «قازاق انالارى - داستۇرگە جول» رەسپۋبليكالىق قوعامدىق بىرلەستىگى ۇسىنعان سالتانات پارحات قىزى تۇرسىنبەكوۆا دا ورتالىق سايلاۋ كوميسسياسىنا قۇجاتتارىن تاپسىردى.
سونداي-اق، كەشە ورتالىق سايلاۋ كوميسسياسىنا فاتيما بيزاكوۆانىڭ كانديدات بولىپ ۇسىنىلعانى تۋرالى قۇجات كەلىپ ءتۇستى. و س ك مالىمەتى بويىنشا، ونى «تاجىريبەلىك پسيحولوگيا» رەسپۋبليكالىق قوعامدىق بىرلەستىگى ۇسىنعان.
ۇمىتكەرلەردى تىركەۋدىڭ سوڭعى ساتىندە تاعى ءبىر كانديدات قۇجاتتارىن تاپسىردى. ول - «قازاقستاندىق فۋتبول اۋەسكەرلەرى ليگاسى» قوعامدىق بىرلەستىگىنىڭ اتىنان نيەت بىلدىرگەن باقىت مارات ۇلى جاڭابايەۆ.
سونىمەن، 11-قازانعا دەيىن كەزەكتەن تىس پرەزيدەنت سايلاۋىنا 12 ادامنىڭ كانيدۋداتۋراسى ۇسىنىلىپ، ونىڭ بەسەۋىن ورتالىق سايلاۋ كوميسسياسى ق ر پرەزيدەنتتىگىنە ۇمىتكەرگە قويىلاتىن تالاپتاردىڭ بارىنە ساي دەگەن قاۋلى قابىلدادى.
قالعان 7 ۇمىتكەردىڭ پرەزيدەنتتىككە كانيديداتۋراسى قانشالىقتى سايكەس ەكەنىن و س ك قاراپ جاتىر.