ەگەر مۇرىن ءجيى نەمەسە كوپ قاناسا، دارىگەرگە كورىنۋ كەرەك. مۇرىن قاناۋىنىڭ 12 سەبەبىن ۇسىنامىز.
مۇرىن قۋىسى پروبلەمالارى
اللەرگيكتەردە مۇرىننان قان كەتۋ سيرەك كەزدەسەتىن جاعداي ەمەس. اللەرگيا بەلگىلەرىنىڭ ءبىرى — شىرىشتى قابىقتىڭ قۇرعاۋى. سونىڭ سەبەبىنەن مۇرىن قۋىسى تىتىركەنىپ، قان كەتەدى. سونداي-اق اللەرگيا كەزىندە ءجيى قولدانىلاتىن مۇرىن تامشىلارى قۇرعاقتىققا اكەلەدى. ءجيى سىڭبىرۋدەن جانە شىرىشتىڭ كوپ بولۋىنان دا مۇرىن قۋىسىنان قان كەتۋى مۇمكىن.
جوعارى قان قىسىمى
قان قىسىمى قاتتى جوعارى بولعان كەزدە قانداعى ەريتروتسيتتەر دۇرىس جۇمىس ىستەمەيدى. ال سوزىلمالى گيپەرتونيا كەزىندە ماڭىزدى ورگاندارعا جانە بۇلشىقەت تىندەرىنە قاننىڭ قۇيىلۋى ناشارلاي تۇسەدى. قان تامىرلاردىڭ قابىرعالارى السىرەيدى، ال ول قان كەتۋگە اكەلەدى.
تىتىركەندىرۋشى زاتتاردى يىسكەۋ
سىزدە اللەرگيا بولماسا دا، ءتۇرلى تىتىركەندىرگىشتەرگە رەاكسيا رەتىندە مۇرنىڭىز قاناۋى مۇمكىن. مىسالى: ىستىق بۋ، سىلتىلەر، اعارتقىش نەمەسە حلور. مۇنداي زاتتاردىڭ بۋىن جۇتقاندا ولار مۇرىننىڭ قۇرعاۋىنا اكەلۋى مۇمكىن. ناتيجەسىندە، مۇرىننان قان اعادى. كەيدە دامدەۋىشتەر نەمەسە باسقا دا كۇشتى يىستەر كوپ جەرگە جاقىن وتساڭىز دا، وسىنداي سالدار بولۋى مۇمكىن.
سوزىلمالى اۋرۋ
قان ۇيىعىشتىعىن بۇزاتىن اۋرۋلار ءجيى مۇرىن قاناۋىنىڭ سەبەبى بولادى. ولارعا بۇيرەك پاتولوگياسى، باۋىر اۋرۋلارى جانە ىشىمدىككە سالىنۋ جاتادى. جۇرەك جەتكىلىكسىزدىگى كەزىندە دە مۇرىننان ءجيى قان كەتۋى مۇمكىن: ول باس اۋرۋىمەن، دەمىكپە جانە مازاسىزدىقپەن بىرگە جۇرەدى.
مۇرىنعا باسقا زاتتىڭ كىرىپ كەتۋى
ەگەر مۇرىنعا بىردەڭە كىرىپ كەتسە، ول مۇرىن قاناۋىنىڭ سەبەبى بولا الادى. بۇل جاعداي كوبىنە كىشكەنتاي بالالاردا كەزدەسەدى. بۇل جەردە مۇرىنعا كىرىپ كەتكەن زاتتىڭ ولشەمى ماڭىزدى ەمەس. ءتىپتى، كىشكەنتاي دەتال نەمەسە لاستىقتىڭ ءوزى مۇرىن قۋىسىنداعى قان تامىرلاردى زاقىمداي الادى.
قاندى سۇيىلتاتىن دارىلەر
قاندى سۇيىلتاتىن دارلەر مۇرىندى قاناتىپ، جاعدايدى قيىنداتۋى مۇمكىن. مۇنداي دارىلەرگە قان ۇيىعى ءتۇزىلۋىنىڭ الدىن الاتىن انتيكواگۋليانتتار، مي قاناينالىمىنىڭ بۇزىلۋى كەزىندە ىشەتىن انتياگرەگانتتار جاتادى. سونداي-اق كەي ادامداردىڭ اسپيرين ىشكەندە مۇرنى قانايدى.
مۇرىن اراقابىرعاسىنىڭ قيسايۋى
مۇرىن اراقابىرعاسى وزگەرىسكە ۇشىراسا، تىنىس الۋ جۇيەسىنىڭ كوپتەگەن فۋنكسيالارى بۇزىلادى. مۇرىننىڭ شىرىشتى قابىعى شىعىڭقى كەلەتىن جەرى جۇقارۋى مۇمكىن. ول تىتىركەندىرگىشتەرگە ادەتتەگىدەن سەزىمتال بولا تۇسەدى دە، وعان كىشكەنتاي اسەردىڭ ءوزى قاننىڭ اعۋىنا ىقپال ەتەدى.
قۇرعاق اۋا
قۇرعاق كليمات نەمەسە ءبىز ۇزاق وتىرعان بولمەدەگى ىستىق اۋا مۇرىننان قان كەتۋگە اكەلۋى مۇمكىن. ولار مۇرىن شىرىشتىسىن تىتىركەندىرەدى. وندا قىشيتىن قابىقشالار پايدا بولادى، ال مەحانيكالىق اسەردەن ول قانايدى.
رانديۋ-ۆەبەرا-وسلەرا سيندرومى
بۇل پاتولوگياسى بار ادامداردا بۇكىل دەنەسىندە، سونداي-اق مۇرىن قابىعىنداعى ۇساق قان تامىرلار كەڭەيىپ كەتەدى. بۇل سيرەك كەزدەسەتىن تۇقىم قۋالايتىن اۋرۋ. بۇل سيندروم كەزىندە مۇرىننىڭ شىرىشتى قابىعىنىڭ ازداپ زاقىمدالۋى قان كەتۋگە سەبەپ بولادى.
دەنە تەمپەراتۋراسىنىڭ بىردەن كوتەرىلۋى
مۇرىننان قان اعۋ — كۇن تيۋ بەلگىلەرىنىڭ ءبىرى. سونداي-اق ول تۇماۋدىڭ سەبەبىنەن دەنە تەمپەراتۋراسىنىڭ كوتەرىلۋى كەزىندە دە قانايدى.
گورموندى فوننىڭ وزگەرۋى
اعزاداعى گورموندار دەڭگەيى وزگەرسە، مۇرىننان قان كەتۋى مۇمكىن. بۇل جاعدايعا كوبىنە جۇكتى ايەلدەر جولىعادى. سونداي-اق ول ەتەككىر ءۇزىلىسى جانە جاس وسىپىرمدەردە جىنىستىق جەتىلۋ كەزىندە ورىن الۋى مۇمكىن.
ك، س دارۋمەندەرىنىڭ جانە كالتسيدىڭ جەتىسپەۋى
اعزاعا دارۋمەندەر جەتىسپەگەن كەزدە مۇرىننان ءجيى قان كەتۋى مۇمكىن. بۇل ءبىزدىڭ قان تامىرلارعا ك جانە س دارۋمەندەرىنىڭ، كالتسيدىڭ تىكەلەي اسەرىمەن بايلانىستى. ەگەر ميكروەلەمەنتتەر جەتىسپەسە، قان تامىرلار جىڭىشكە ءارى سىنعىش بولا تۇسەدى دە، كىشكەنتاي اسەردىڭ وزىنەن قانايدى.
massaget.kz