الماتىعا ەكىباستۇزدان كەلگەن 31 جاستاعى ەر ادام كامەلەتكە تولماعان قىزدى زورلاپ، قاراقشىلىق شابۋىل جاسادى دەگەن كۇدىك بار. پ د باسپا ءسوز قىزمەتىنىڭ حابارلاۋىنشا، بۇل قىلمىس 11 شىلدەدە جەكە ۇيلەر الابىندا بولعان.
تۇسكى ۋاقىتتا كۇدىكتى پوكروۆسكايا كوشەسىندە ورنالاسقان ۇيلەردىڭ بىرىنە كىلتتى تاڭداۋ ارقىلى كىرگەن. ۇيدە 2 بالا - ءتورت جاستاعى ۇل بالا مەن ونىڭ 15 جاستاعى اپكەسى بولعان. قاسكوي پىشاقپەن قورقىتىپ، 17 مىڭ دوللاردى يەمدەنىپ، سودان كەيىن قىزدى قورلاعان.
جانتۇرشىگەرلىك قىلمىستى اشۋ ءۇشىن ارنايى جەدەل تەرگەۋ توبى قۇرىلدى.
«بۇگىن ءبىزدىڭ بولىمشەنىڭ كريمينالدىق پوليتسيا ءبولىمىنىڭ قىزمەتكەرلەرى كۇدىكتىنىڭ جاسىرىنىپ وتىرعان ءۇيىن انىقتادى. ول ءال-فارابي داڭعىلىنداعى تۇرعىن ۇيلەردىڭ ءبىرىنىڭ 12-قاباتىنداعى پاتەردە بولعان. پوليتسيا كەلگەندە ەر ادام اشىق تەرەزەدەن سەكىرىپ، تومەندەگى تەرراساعا تۇسكەن.
ونىڭ ارتىنان ءوز ءومىرىن قاۋىپكە تىگىپ، پوليتسيانىڭ جەدەل ۋاكىلى، پوليتسيا مايورى باقىتجان باكىروۆ سەكىردى. ول اياعىنىڭ سىنعانىنا قاراماستان، كۇدىكتىنىڭ جولىن جاۋىپ، قاشىپ كەتۋىنە مۇمكىندىك بەرمەدى»، - دەدى تۇركسىب اۋداندىق پوليتسيا باسقارماسى جانىنداعى پوليتسيا ءبولىمىنىڭ باستىعى ەرلان ايانبايەۆ.
قازىر تەرگەۋ قىلمىستىق كودەكستىڭ ەكى بابى بويىنشا: ق ر ق ك 192-بابىنىڭ 4- ءبولىمى جانە ق ر ق ك 120-بابىنىڭ 4- ءبولىمى بويىنشا جۇرگىزىلىپ جاتىر. كۇدىكتى ۋاقىتشا ۇستاۋ يزولياتورىنا قامالدى. سونىمەن قاتار، الماتى قالالىق پوليتسيا دەپارتامەنتى باقىتجان باكىروۆ اسا قاۋىپتى قىلمىسكەردى ۇستاۋ كەزىندە كورسەتكەن بەلسەندىلىگى ءۇشىن ماراپاتقا ۇسىنىلاتىنىن مالىمدەدى.