بيىل 12 مىڭ كوپبالالى انا قونىس تويىن تويلايدى
«قازىرگى تاڭدا ەلىمىزدە 340 مىڭنان استام كوپبالالى انالار ءومىر سۇرۋدە. ولارعا مەملەكەت تاراپىنان كورسەتىلەتىن 93 ميلليارد تەڭگەنىڭ الەۋمەتتىك كومەگى بيىل 820 مىڭنان استام ادامعا بەرىلەدى. 1 توقساننىڭ وزىندە 9 ميلليارد تەڭگەدەن استام قارجى ءبولىنىپ، 280 مىڭعا جۋىق قازاقستاندىق قامتىلدى. كەلەسى ەڭ وزەكتى ماسەلەلەردىڭ ءبىرى - مۇنداي وتباسىلاردى جۇمىسپەن قامتۋ. ءبىزدىڭ جوسپارىمىز بويىنشا بيىل 370 مىڭعا جۋىق جاڭا جۇمىس ورنى اشىلۋى كەرەك. سونىڭ كەم دەگەندە 85 مىڭى كوپبالالى وتباسىلارعا ارناپ اشىلادى»، - دەدى مينيستر.
ونىڭ اتاپ وتۋىنشە، وسى جىلدىڭ 1 - توقساندا قازاقستاندا 32 مىڭ جاڭا جۇمىس ورنى اشىلدى. سونىڭ 9 مىڭعا جۋىعى كوپبالالى انالارعا ارنالعان.
«جوسپار بويىنشا 6 مىڭعا جۋىق جالدامالى پاتەر جىل سايىن كوپبالالى وتباسىلارعا بەرىلىپ وتىراتىن بولادى. بۇعان قوسىمشا تاعى 16 مىڭ پاتەر «تۇرعىن ءۇي قۇرىلىس جيناق بانكى» ارقىلى جەڭىلدەتىلگەن پايىزدىق مولشەرلەمەممەن 2019-2021 -جىلدارى بەرىلەدى. جالپى جەتى جىلدىڭ ىشىندە ەڭ كەمىندە 40 مىڭعا جۋىق جالدامالى پاتەر بەرىلۋى كەرەك. وعان قوسىمشا ءۇش جىلدىڭ ىشىندە تۇرعىن ءۇي قۇرىلىس جيناق بانكى ارقىلى جەڭىلدەتىلگەن زايممەن كەمىندە 18 مىڭ پاتەر بەرىلۋى ءتيىس. ياعني، وسى ۋاقىتتىڭ ىشىندە 54 مىڭعا جۋىق پاتەر بەرىلۋى كەرەك. ونىڭ 12 مىڭى بيىل بەرىلەدى»، - دەدى ب. ساپاربايەۆ.
اۆتور: مارلان جيەمباي