وڭتۇستىك كورەيادا 12 مىڭعا تارتا قازاقستاندىق زاڭسىز ءجۇر
«ءبىزدىڭ قازاقستاندىق كوپ ازامات وڭتۇستىك كورەياعا ەكى مەملەكەت اراسىنداعى ۆيزاسىز رەجىمگە سۇيەنىپ بارىپ، سول جاقتا قالىپ قويىپ جاتىر. سوندىقتان، ولاردىڭ قولىندا ۆياسى بار، ۆيزاسى ءبىتىپ قالدى دەپ ايتۋعا بولمايدى. ولار جالعان اقپاراتپەن كىرىپ، جۇمىس ىستەپ، كورەيانىڭ اۋماعىندا قالىپ قويىپ جاتىر. قازىرگى تاڭدا 39 مىڭ قازاقستاندىق ازامات كورەياعا باردى دەگەن اقپارات - ول بارىپ-قايتىپ كەلگەن ادامداردىڭ جالپى سانى. ءبىزدىڭ كونسۋلدىقتىڭ اقپاراتىنا سايكەس، قازىرگى تاڭدا 19 مىڭ قازاقستاندىق رەسمي تۇردە (وڭتۇستىك كورەيادا - اۆت.) تىركەلگەن، شامامەن 12 مىڭعا جۋىق قازاقستاندىق زاڭسىز تۇردە ءجۇر»، - دەيدى ق ر س ءى م رەسمي وكىلى ايبەك سمادياروۆ ۆەدومستۆودا وتكەن باسپا ءسوز ءماسليحاتىندا.
ونىڭ ايتۋىنشا، وسىدان ءبىر-ەكى اپتا بۇرىن حابارلانعانداي، وڭتۇستىك كورەيا ۇكىمەتى «جاسىل ءدالىز» ءىس-شاراسىن باستاعان. سول اكسياعا سايكەس، وسى جىلدىڭ 1 -قازانىنان باستاپ كەلەسى جىلدىڭ 31 -ناۋرىزىنا دەيىن كورەيا اۋماعىندا جۇمىس ىستەپ زاڭسىز جۇرگەن ازاماتتار ءوز ەركىمەن ەلدەرىنە قايتاتىن بولسا، ەشقانداي ايىپپۇلعا ىلىكپەي، ءوز ەلىنە قايتادى. ال ەگەر ونى قولدانباي، كۇشەيتىلگەن رەيدتەردىڭ قولدارىنا تۇسسە، وندا 6,5 ميلليون تەڭگە ايىپپۇل ارقالاپ، ول ازاماتقا ون جىل مەرزىمگە كورەياعا كىرۋگە تىيىم سالىنادى.
«سوڭعى ەكى اپتانىڭ ىشىندە سىرتقى ىستەر مينيسترلىگىنە جانە ءبىزدىڭ سەۋل قالاسىنداعى ەلشىلىككە وسى جاعدايدىڭ ءمان- جايىن ءتۇسىندىرۋدى وتىنگەن قازاقستاندىقتاردان قوڭىراۋلار مەن حاتتار ءتۇسىپ جاتىر. كوبىسى ەستىدى. ءبىزدىڭ ويىمىزشا، بۇل ءىس- شارانى ەسكەرىپ، قازاقستانعا ورالاتىنداردىڭ سانى كوبەيەدى»، - دەيدى ول.
ەسكە سالا كەتسەك، وسىدان ءبىر اپتا بۇرىن ايبەك سمادياروۆ وڭتۇستىك كورەيادا زاڭسىز جۇرگەندەر قازاقستانعا ەش كەدەرگىسىز ورالا الاتىنىن ءمالىم ەتكەن بولاتىن.