گولوۆكيننىڭ قىتايلىق ءىزباسارى 12- كەزدەسۋىندە جەڭىسكە جەتتى - فوتو، كەسكىن

استانا. قازاقپارات - قىتايدىڭ قازاقتار شوعىرلانعان ءوڭىرى التاي ايماعىندا تۇراتىن قانداسىمىز، 22 جاستاعى كاسىپقوي بوكسشى بەيسەنبى ءناسيوللا ۇلى (10-0-1, 5 ك و) 12 كەزدەسۋىندە قارسىلاسىنان باسىم ءتۇسىپ، سۋپەر جەڭىل سالماق دارەجەسى بويىنشا (WBA) قىتاي چەمپيونى بەلبەۋىن قورعاپ قالدى.

قىتايدىڭ حانجوۋ قالاسىندا بولعان كەزدەسۋدە بەيسەنبى جاڭازەلانديالىق لەكي ماكانى (9-0-0, 3 ك و) 10 راۋندقا سوزىلعان ايقاستا ايقىن باسىمدىلىقپەن (99:92,98:92,98:92) تىزە بۇكتىردى.

قىتايلىق جانكۇيەرلەرى گولوۆكيننىڭ ءىزباسارى دەپ اتاپ كەتكەن بەيسەنبى كاسىبي رينگتە جالپى 12 كەزدەسۋ وتكىزىپ، 11-ايقاستا جەڭىسكە جەتكەن (5 نوكاۋت) جانە بىرەۋىندە تەڭ تۇسكەن. ال بۇل بەيسەنبىنىڭ 2016-جىلى وتكىزىپ وتىرعان 5 كەزدەسۋى، سونداي-اق ەكىنشى رەت قىتاي چەمپيونى بەلبەۋىن قورعاۋى.

«بۇل مەنىڭ العاشقى رەت ەرەسەكتەر اراسىنداعى ايقاسقا شىعۋىم، قارسىلاسىم ءالى جەڭىلىپ كورمەگەن تاجيربەلى بوكسشى. بۇل مەنىڭ ەكىنشى رەت قىتاي چەمپيونى اتاعىن قورعاۋىم. ەندى ازيا قۇرلىعىنىڭ اتاعىنا تالپىناتىن جوسپارىم بار. قازاق ەلىنىڭ 25 جاسقا تولىپ وتىرعان قۋانىشتى كۇنىندە جەڭىسكە جەتكەنىمدى ماقتان تۇتامىن جانە بۇل جەڭىسىمدى الىستاعى اعايىن اتىنان تاۋەلسىز قازاقستاننىڭ 25 جىلدىعىنا ارناعىم كەلەدى»، - دەدى ول قازاقپارات تىلشىسىنە بەرگەن سۇحباتىندا.

ەسكە سالا كەتەيىك، بەيسەنبى بۇعان دەيىن WBC نۇسقاسى بويىنشا بوكستان جاستار اراسىنداعى الەم چەمپيونى (WBC World Youth Champion) جانە WBA بويىنشا قىتاي چەمپيونى اتانعان بولاتىن. بۇعان دەيىن بەيسەنبىنىڭ قازاقستاندىق كاسىپقوي بوكسشى قانات يسلامنىڭ تۋعان جەرى التايدىڭ قابا اۋدانىندا تاعى ءبىر قازاق بوكسشىسىنىڭ شىققانىن حابارلاعان بولاتىنبىز.

مۇحتار قاليموللا ۇلى