استانادا ءبىر كولىكتىڭ ورنى 12 مىڭ دوللار بولاتىن اۆتوتۇراق سالىنا جازداعان

استانا. قازاقپارات - 2016 -جىلدىڭ 7 -ءساۋىرى كۇنى استانا قالالىق اكىمدىگىندە وتكەن مەملەكەتتىك- جەكەمەنشىك سەرىكتەستىك جوبالارىنىڭ تانىستىرىلىمىنا ارنالعان دوڭگەلەك ۇستەل بارىسىندا «Astana Innovations» ا ق مەملەكەتتىك-جەكەمەنشىك سەرىكتەستىكتى دامىتۋ باسقارماسىنىڭ باسشىسى ءاليا بيكەيەۆا ەلوردادا 6 قاباتتى جەراستى اقىلى ەكى پاركينگ جانە 3 قاباتتى اقىلى ءبىر پاركينگ سالىنادى دەپ مالىمدەگەن ەدى.

مىنە، وسى اۆتوتۇراقتار مەن پاركينگتەردىڭ جوباسى ازىرگە توقتاتىلعان. بالكىم، توقتاعانى دا دۇرىس شىعار، سەبەبى، ول پاركينگتەر مەن اۆتوتۇراقتارداعى ءبىر كولىك تۇراتىن ورىننىڭ باعاسى 12 مىڭ دوللارعا باعالانىپتى. بۇل تۋرالى قازاقپارات ءتىلشىسىنىڭ سۇراعىنا جاۋاپ بەرە وتىرىپ، «اتامەكەن» ۇلتتىق كاسىپكەرلەر پالاتاسى ءتوراعاسىنىڭ ورىنباسارى يۋليا ياكۋپوۆا ءمالىم ەتتى.

«بۇل جوبالار ازىرگە توقتاتىلدى. سەبەبى، ازىرلەنگەن قۇجاتقا قاراساق، ءبىر تۇراقتىڭ ورنى 12 مىڭ دوللاردى قۇرايدى. ارينە، بۇل وتە كوپ اقشا، وتە ۇلكەن تاريف. بۇل باعا ءوزىن ءوزى اقتامايدى»، - دەدى يۋ. ياكۋپوۆا. ونىڭ ايتۋىنشا، ۇلتتىق كاسىپكەرلەر پالاتاسى بۇل جوبالار بويىنشا جەكە ارىپتەسپەن، استانا قالاسىنىڭ اكىمدىگىمەن، جەكە ينۆەستورمەن بىرگە وتىرىپ، قۇرىلىستىڭ باسقا نۇسقاسىن قاراۋدى ۇسىنعان ەكەن. «اۋەل باستان ءبىز وسى جوبا بويىنشا بىرگە وتىرىپ، قۇرىلىستىڭ باسقا نۇسقاسىن قاراۋدى ۇسىنعانبىز. جالپى، اۆتوتۇراق، بالاباقشا، پاركينگ سياقتى جوبالار بويىنشا قيىن كونكۋرستىق پروتسەدۋلارداردان باس تارتۋ كەرەك. ياعني، قانداي دا ءبىر جوبا بويىنشا ليميت بەكىتىپ، كەز كەلگەن جەكە ينۆەستوردى سول ليميت اياسىندا ىزدەۋ كەرەك»، - دەدى ول.

ايتا كەتەيىك، كوكتەمدە «Astana Innovations» ا ق مەملەكەتتىك- جەكەمەنشىك سەرىكتەستىكتى دامىتۋ باسقارماسىنىڭ باسشىسى ءاليا بيكەيەۆا استانادا التى قاباتتى ءبىرىنشى پاركينگ - قابانباي باتىر داڭعىلىندا (ينۆەستيتسيالار جانە دامۋ مينيسترلىگىنىڭ جانىندا)، ەكىنشى جەراستى پاركينگى - ورىنبور كوشەسىندە (جوعارعى سوتتىڭ جانىندا) ورنالاسسا، ءۇش قاباتتى ءۇشىنشى پاركينگ دوستىق كوشەسىندە («ماسكەۋ» بيزنەس ورتالىعىنىڭ ماڭىندا) ورنالاسادى دەگەن ەدى.

سونداي-اق، قابانباي باتىر داڭعىلىنداعى پاركينگتىڭ قۇرىلىسى 2017-2018 -جىلدارعا جوسپارلانعان. جانە پاركينگ 2045 -جىلعا دەيىن قىزمەت كورسەتە الادى دەپ سەندىرگەن بولاتىن كومپانيا وكىلدەرى. «التى قاباتتى اۆتوتۇراققا 568 كولىك سىيادى. بۇل پاركينگكە 2 200 ملن تەڭگە ينۆەستيتسيا كەرەك.

«ورىنبور كوشەسىندەگى التى قاباتتى پاركينگتىڭ قۇنى 1,93 ميلليارد تەڭگە. اۆتوتۇراققا 472 كولىكتىڭ ورنى سالىنادى. دوستىق كوشەسىندە ورنالاساتىن ءۇش قاباتتى پاركينگتىڭ قۇنى 1,31 ميلليون تەڭگەنى قۇرايدى. وعان 300 كولىك سىيادى»، - دەگەن بولاتىن ءا. بيكەيەۆا. كومپانيا التى قاباتتى جەر استى اۆتوتۇراعى مەن ءۇش قاباتتى پاركينگتىڭ باعاسى - ساعاتىنا 100 تەڭگە، ءبىر تۇنگە كولىك قالدىرۋ باعاسى - 600 تەڭگە بولادى دەپ حابارلاعان. ي. ياكۋپوۆا قالادا وسى اۆتوتۇراقتار مەن پاركينگتەردىڭ مىندەتتى تۇردە سالىناتىنىن، ءبىراق، ءبىر ورىنعا بەلگىلەنگەن باعاعا بايلانىستى، قازىر توقتاپ تۇرعانىن تاعى دا ەسكە سالدى.

اۆتور: كەنجەكەي توقتامۇرات قىزى